Marhum reper Tupak Shakurning oltin uzugi Nyu-Yorkda bo‘lib o‘tgan auksionda rekord darajadagi qiymatda — 1,02 million dollarga sotildi. Bu 300 ming dollarga baholangan zargarlik buyumining asl narxidan uch baravar qimmatroq, deb xabar bermoqda “Pravila jizni” nashri.
.jpg)
Fox nashri taqdim etgan ma’lumotlarga ko‘ra, bu uzuk auksionda sotilgan xip-xop bilan bog‘liq eng qimmat buyum bo‘ldi. Xaridorning ismi oshkor etilmagan.
Tupak uzukning dizaynini o‘zi ishlab chiqqan. Reper uzukni 1996-yil 4-sentabrda MTV Video Music Awards marosimida so‘nggi marta omma oldida chiqish qilgan paytda taqqan edi.
Uzuk o‘rta asrlardagi Yevropa qirollari tojlari dizaynidan ilhomlanib, toj shaklida qilingan. U kabochon uslubida kesilgan dumaloq olmos va yoqutlar bilan bezatilgan.
Zargarlik buyumining tashqi tomoniga Pac&Dada 1996 yozuvi o‘yib yozilgan bo‘lib, u reperning aktrisa va dizayner Kidada Jons bilan unashtirilgani xotirasiga bag‘ishlangan.
Tupak Shakur 25 yoshida, 1996-yil 13 sentabrda Las-Vegasda mashinasida ketayotganida unga o‘q uzilganidan bir hafta o‘tib vafot etgan.
Uning qotili haligacha topilmagan, biroq AQSHning Nevada shtati politsiyasi tergov ishini davom ettirmoqda. Noyabr oyi o‘rtalarida politsiya xodimlari Tupak o‘ldirilgan joydan 30 km uzoqlikda joylashgan Las-Vegas chekkasidagi Xenderson shahridagi uyni tintuv qilgan.
Izoh (0)