Hindistonlik Kanyaboyin Sudahkar ismli erkak o‘zining kamyob va g‘ayrioddiy avtomobillar kolleksiyasi bilan Ginnesning rekordlar kitobiga kiritildi, deb xabar bermoqda Tengri Auto.
Uning mashinalar kolleksiyasi Haydarobod shahridagi Sudha Cars muzeyida saqlanadi. 57 ta ajoyib ko‘rinishdagi mashinalarning barchasi shaxsan Sudahkar tomonidan ishlab chiqarilgan. Muallif kundalik predmetlardan ilhomlanib turli xildagi san’at asarlarini yaratgan.
2010-yilda tashkil etilgan mazkur muzey o‘zining aqlbovar qilmaydigan mashinalari bilan mashhur bo‘lib, ular kompyuter, sumka, poyabzal va hatto oziq-ovqat mahsuloti ko‘rinishiga ega.
Sudahkar ushbu hobbiga kelishiga bolalikdagi voqea sabab bo‘lgan, u 14 yoshida metallolomdan bo‘laklarini topib olib, ularning qismlaridan avtomobillar yaratishni boshlagan. Ma’lum vaqt o‘tib erkak o‘z hobbisini biznesga aylantirgan. Uning birinchi mehnat mahsuli 2005-yilda eng katta uch g‘ildirakli velosiped sifatida rekord o‘rnatgan.
Hozirda Sudha Cars muzeyida nafaqat avtomobillar, balki turli ko‘rinishdagi mototsikllar ham saqlanadi. Masalan, kolleksiyadagi eng kichik mototsiklning balandligi atigi 33 santimetrni tashkil qiladi.
Muzeydagi har bir eksponat yonida avtomobilning o‘ziga xos xususiyatlari va uni yaratishga sarflangan vaqt kabi ma’lumotlar yozib qoldirilgan. Ba’zi mashinalar, masalan, qalam yoki burger shaklidagilar ma’lum bayram tadbirlariga atab maxsus ishlab chiqilgan.
Izoh (0)