Venses Palau Fernandes ismli barselonalik erkak o‘zining eng katta mobil telefonlari kolleksiyasi bilan Ginnes rekordlari kitobiga kiritildi. Uning to‘plami 3615 ta noyob mobil qurilmalardan iborat.
Fernandes 1999-yilda yangi yil bayrami sovg‘asi sifatida Nokia 3210 rusumli telefonini olgan, shundan so‘ng erkakda uyali telefonlarga katta ishtiyoq paydo bo‘lgan. 2008-yildan boshlab u Finlyandiya brendiga mansub mobil telefonlarni yig‘ishni boshlagan, keyinchalik to‘plamga boshqa brendlar ham kiritilgan va oxir-oqibat rekord darajadagi kolleksiyaga aylangan.
Palau so‘zlariga ko‘ra, u avvaliga doimiy yangi chiqqan telefon brendlarini muntazam xarid qilgan, ma’lum vaqt o‘tib u bu hobbini bir yilga tashlab qo‘ygan. Keyinroq rekordchi o‘zining sevimli mashg‘ulotiga boshqa maqsad bilan qaytdi: endilikda Fernandes nafaqat bozorda mavjud mobil telefonlar, balki ularning sotuvga chiqmagan prototiplarini ham yig‘ishga tushdi.
To‘plamida Siemens, NEC, Motorola, Blackberry, Samsung, HTC, Apple va boshqa ko‘plab brendlarga tegishli telefonlar mavjud. Ularning ba’zilari cheklangan miqdorda ishlab chiqarilgan. Masalan, “Yulduzlar jangi” filmiga monand dizaynda ishlab chiqilgan Yoda, Obi-Van Kenobi kabi qahramonlar uslubidagi telefonlar shular jumlasidandir.
“Mening kolleksiyamda kamyob va cheklangan miqdorda ishlab chiqarilgan telefon modellari mavjud. Mening hobbiyim katta sabr va moliyaviy harakatlar natijasidir. To‘plam hali o‘z nihoyasiga yetmagan, shu sababli men uni iloji boricha kengaytirishda davom etmoqchiman”, deydi Venses Palau Fernandes.
Bundan avval xuddi shu rekord o‘tgan yili Ruminiya fuqarosi Andrey Bilbi Arjentis tomonidan o‘rnatilgandi. Uning to‘plami 3456 ta telefondan iborat edi.
Izoh (0)