Shavkat Mirziyoyev 21-fevral kuni Mudofaa sanoati agentligining Innovatsion texnologiyalar markaziga tashrif buyurib, bu yerdagi ishlab chiqarish quvvatlari, ilg‘or ishlanmalar, harbiy va ikki xil maqsadga mo‘ljallangan mahsulotlar bilan tanishdi.
Armiya qobiliyatini mustahkamlashda harbiy xizmatchilarning professional tayyorgarligi bilan bir qatorda mudofaa sanoatini rivojlantirish muhim o‘rin tutadi. Prezident tashabbusi bilan O‘zbekistonda zamonaviy mudofaa sanoatiga asos solingani tarixiy ahamiyatga ega bo‘ldi.
Mudofaa vazirligi huzuridagi agentlik tomonidan qurol-yarog‘larni modernizatsiya qilish, yangi texnologiyalarni o‘zlashtirish va istiqbolli ishlanmalarni qo‘shinlarda joriy etish bo‘yicha tizimli ishlar amalga oshirilmoqda.
Shavkat Mirziyoyev harbiy xavfsizlik va davlat mudofaasini mustahkamlash masalalari bo‘yicha o‘tkazilgan yig‘ilishda milliy armiya zamonaviy qurol-yarog‘ va texnika bilan ta’minlanayotgani, harbiy xizmatchilarning jangovar va ma’naviy tayyorgarligi sezilarli darajada oshganini ta’kidladi.
Olib borilgan islohotlar natijasida ilg‘or tajribadan kelib chiqib, ichki va tashqi xatarlarning oldini olish va bartaraf etish bo‘yicha yangi jangovar bo‘linmalar tuzildi, qo‘shinlar tarkibi optimallashtirildi.
Bundan tashqari, keskin va samarali o‘zgartirishlar sharoitida armiyani modernizatsiya qilish va zamonaviy qurollantirishning yangi tizimi – mudofaa sanoati yanada rivojlantirildi, qo‘shimcha korxonalar tashkil etildi.
Davlatimiz armiyasining nufuzi xalqaro miqyosda ham oshib bormoqda. 20 dan ziyod mamlakat bilan ikki tomonlama harbiy hamkorlik yo‘lga qo‘yilgani, 400 dan ortiq qo‘shma mashg‘ulotlarda yuqori ko‘rsatkichlarga erishilganligi buni tasdiqlaydi.
Qolaversa, armiya uchun malakali va raqobatbardosh kadrlar tayyorlash tizimi yaratildi. Jumladan, Harbiy oliygohlarning infratuzilmasi to‘liq modernizatsiya qilindi, o‘quv dasturi va metodikasi bugungi kun talablariga moslashtirildi.
Ijtimoiy davlatchilik siyosati natijasida harbiylar va ularning oila a’zolarini ijtimoiy-huquqiy himoya qilish ham kuchaydi. Jumladan, 30 mingga yaqin oila uy-joy bilan ta’minlandi, o‘tgan yil davomida 2 mingdan ortiq harbiy xizmatchilarning farzandlariga oliy ta’lim muassasalariga o‘qishga kirish uchun imtiyozlar berildi.
Jamiyat va armiya birligi, yoshlarni harbiy vatanparvarlik ruhida tarbiyalash vatan himoyachilariga sharoit yaratishda harbiy-ma’muriy sektorlar, davlat va jamoat tashkilotlari ham ishtirok etmoqda. Yoshlarni vatanparvarlik ruhida tarbiyalash, maktablarda ularni chaqiruvga qadar boshlang‘ich harbiy tayyorlashga e’tibor kuchaytirilmoqda.
Shubhasiz, natijalarga o‘ta qiyin sharoitda, xalqaro vaziyatning keskinlashib borayotgan sharoitida erishildi. Bular albatta bu yo‘nalishdagi olib borilayotgan siyosatning dastlabki natijalari. O‘z navbatida erishilayotgan yutuqlar har bir fuqaroga faxr tuyg‘usini baxsh etib, vatan uchun, davlat uchun olib borilayotgan ishlarga daxldorlik hissini kuchaytiradi.
Sayfiddin Jo‘rayev, siyosiy fanlar doktori, Toshkent sharqshunoslik universiteti Xalqaro munosabatlar kafedrasi professori
Izoh (0)