Bugun, 12-fevral kuni Komil Allamjonovga suiqasd bo‘yicha 10 kishiga nisbatan sud hukmi e’lon qilingani haqida xabar berilgandi.
E’lon qilingan sud hukmiga muvofiq Komil Allamjonovga suiqasd tashkilotchiligida ayblangan Javlon Yunusovga 18 yil-u 6 oy, Shuhrat Rasulov, Shohrux Ahmedov va Ismoil Jahongirovga 23 yil, Doniyor Toshxo‘jayevga esa 7 yil muddatga ozodlikdan mahrum qilish jazosi tayinlandi.
Qolgan 5 nafar sudlanuvchiga qilmishiga muvofiq ravishda turli muddatlarga ozodlikdan mahrum qilish jazolari tayinlandi.
Komil Allamjonov Telegram sahifasida post qoldirib, haqiqat hech qachon sinmasligi, baribir yuzaga chiqishini aytib o‘tdi.
“Katta oyim rahmatlik har doim duo qilganlarida o‘t balosidan, suv balosidan, quruq tuhmatdan Allohning o‘zi asrasin, derdilar. O‘tgan 5 oy ichida o‘zimdan o‘tgani faqat o‘zimga, oilamga, eng yaqinlarimga ayon. Haqiqat egilganda egilib, bukilgandayam ikki bukilib baribir sinmadi, u baribir yuzaga chiqdi. Yuzaga chiqadi ham.
Allohga ming shukur. Bandasidan qochganlar Yaratgandan qocholmaydi. Hali oldinda qiladigan ishlar, yana ko‘p sinovli kunlar bor. Ilohim bularning hammasidan yorug‘ yuz bilan o‘tish nasib qilsin!
Alloh hammamizning omadimizni bersin!”, deb yozdi Komil Allamjonov.
Komil Allamjonov 2017-yil dekabrida O‘zbekiston prezidenti matbuot xizmati rahbari bo‘lgan, 2018-yil noyabrida O‘zbekiston Matbuot va axborot agentligiga rahbar bo‘lgan (2019-yil fevralidan bu tashkilot Prezident administratsiyasi huzuridagi Axborot va ommaviy kommunikatsiyalar agentligi sifatida qayta tashkil etilgandi).
U 2020-yil yanvar oyida Mass-mediani qo‘llab-quvvatlash fondi vasiylik kengashi raisi sifatida ish boshlagan, 2022-yil iyulida prezident administratsiyasi rahbariga o‘rinbosar bo‘lgandi.
2023-yil avgustidan 2024-yilning 30-sentyabr kuniga qadar Prezident administratsiyasi Axborot siyosati departamentining rahbari bo‘lgan.
Uning rahbarligi paytida yurtimizda so‘z erkinligini rivojlantirish, davlat organlari faoliyatining ochiqligini ta’minlash va xalq ta’limi tizimini takomillashtirish bo‘yicha prezident belgilab bergan ustuvor vazifalarni amalga oshirishda katta natijalarga erishilganini alohida ta’kidlash zarur.
Komil Allamjonov o‘z chiqishlari chog‘ida matbuot erkin bo‘lishi kerakligi, so‘z erkinligi barchaning huquqi ekanini ko‘p bor ta’kidlagan.
"So‘z erkinligi – bu barchaning huquqi. Matbuotning ham, unda aks ettirilayotgan shaxslarning ham. Shu muvozanatni ushlash muhim. Demak, ortga yo‘l yo‘q – bu aniq. Faqat oldinga. Oldinga – huquq, me’yor va qonun doirasida, oldinga.
Bugungi davrda matbuot – nafaqat ko‘zgu, balki mudofaa, xavfsizlik masala darajasidagi institutdir", – deb aytgan Komil Allamjonov jurnalistlar bilan yig‘ilsishda.
Izoh (0)