Shavkat Mirziyoyev va Vladimir Putinning telefon orqali muloqoti bo‘lib o‘tdi, deb xabar bermoqda Prezident matbuot xizmati.
Ma’lum qilinishicha, 21-fevral kuni bo‘lib o‘tgan telefon orqali muloqotda davlat rahbarlari O‘zbekiston bilan Rossiya o‘rtasidagi keng qamrovli strategik sheriklik va ittifoqchilik munosabatlarini yanada rivojlantirish va mustahkamlashning dolzarb masalalarini muhokama qildi.
Rossiya prezidentining o‘tgan yil may oyidagi O‘zbekistonga davlat tashrifi davomida erishilgan kelishuvlarni yetakchilar tomonidan tasdiqlangan “yo‘l xaritasi”ga muvofiq amalga oshirish natijalari ko‘rib chiqildi.
Turli darajalarda faol davom etayotgan samarali muloqot va almashinuvlar yuksak baholandi. Savdo-iqtisodiy va investitsiyaviy hamkorlikdagi asosiy ko‘rsatkichlarning o‘sish sur’atini ta’minlash, shuningdek, ikki mamlakat hududlarida sanoat kooperatsiyasi loyihalarini qo‘llab-quvvatlashga alohida e’tibor qaratildi.
Gumanitar hamkorlik, eng avvalo, madaniyat, san’at, fan, ta’lim, shu jumladan, muhandis kadrlarni tayyorlash, sog‘liqni saqlash va sport sohalarida kengayib borayotgani qayd etildi.
Prezidentlar xalqaro kun tartibidagi masalalar yuzasidan ham fikr almashib, bo‘lajak tadbirlar rejasini muhokama qildi.
Vladimir Putin davlat tashrifi bilan O‘zbekistonda 2024-yilning 26–28-may kunlari bo‘lgandi. Shavkat Mirziyoyev Rossiya prezidentining davlat tashrifi hamkorlikning yangi davrini boshlab beruvchi tarixiy voqea deb atagandi. Tashrif davomida energetika, shu jumladan, atom energetikasi, qishloq xo‘jaligi, innovatsiyalar, migratsiya, xavfsizlik va boshqa sohalarda o‘zaro manfaatli hamkorlikni rivojlantirish masalalarini atroflicha muhokama qilingandi. Tashrif yakunida bir qator hujjatlar, jumladan, O‘zbekiston va Rossiya hamkorligining ustuvor yo‘nalishlarida hamkorlikni kengaytirish bo‘yicha qo‘shma harakatlar rejasi imzolangandi.
Shavkat Mirziyoyev va Rossiya prezidenti Vladimir Putin muzokaralar hamda hududlar kengashi yig‘ilishidan so‘ng tonggi soat uchgacha muloqotni davom ettirgan. Shunday qilib Putinning O‘zbekistonga davlat tashrifi rejalashtirilganidek ikki kun emas, balki uchinchi kun ham davom etgandi.
Izoh (0)