Шавкат Мирзиёев 21 февраль куни Мудофаа саноати агентлигининг Инновацион технологиялар марказига ташриф буюриб, бу ердаги ишлаб чиқариш қувватлари, илғор ишланмалар, ҳарбий ва икки хил мақсадга мўлжалланган маҳсулотлар билан танишди.
Армия қобилиятини мустаҳкамлашда ҳарбий хизматчиларнинг профессионал тайёргарлиги билан бир қаторда мудофаа саноатини ривожлантириш муҳим ўрин тутади. Президент ташаббуси билан Ўзбекистонда замонавий мудофаа саноатига асос солингани тарихий аҳамиятга эга бўлди.
Мудофаа вазирлиги ҳузуридаги агентлик томонидан қурол-яроғларни модернизация қилиш, янги технологияларни ўзлаштириш ва истиқболли ишланмаларни қўшинларда жорий этиш бўйича тизимли ишлар амалга оширилмоқда.
Шавкат Мирзиёев ҳарбий хавфсизлик ва давлат мудофаасини мустаҳкамлаш масалалари бўйича ўтказилган йиғилишда миллий армия замонавий қурол-яроғ ва техника билан таъминланаётгани, ҳарбий хизматчиларнинг жанговар ва маънавий тайёргарлиги сезиларли даражада ошганини таъкидлади.
Олиб борилган ислоҳотлар натижасида илғор тажрибадан келиб чиқиб, ички ва ташқи хатарларнинг олдини олиш ва бартараф этиш бўйича янги жанговар бўлинмалар тузилди, қўшинлар таркиби оптималлаштирилди.
Бундан ташқари, кескин ва самарали ўзгартиришлар шароитида армияни модернизация қилиш ва замонавий қуроллантиришнинг янги тизими – мудофаа саноати янада ривожлантирилди, қўшимча корхоналар ташкил этилди.
Давлатимиз армиясининг нуфузи халқаро миқёсда ҳам ошиб бормоқда. 20 дан зиёд мамлакат билан икки томонлама ҳарбий ҳамкорлик йўлга қўйилгани, 400 дан ортиқ қўшма машғулотларда юқори кўрсаткичларга эришилганлиги буни тасдиқлайди.
Қолаверса, армия учун малакали ва рақобатбардош кадрлар тайёрлаш тизими яратилди. Жумладан, Ҳарбий олийгоҳларнинг инфратузилмаси тўлиқ модернизация қилинди, ўқув дастури ва методикаси бугунги кун талабларига мослаштирилди.
Ижтимоий давлатчилик сиёсати натижасида ҳарбийлар ва уларнинг оила аъзоларини ижтимоий-ҳуқуқий ҳимоя қилиш ҳам кучайди. Жумладан, 30 мингга яқин оила уй-жой билан таъминланди, ўтган йил давомида 2 мингдан ортиқ ҳарбий хизматчиларнинг фарзандларига олий таълим муассасаларига ўқишга кириш учун имтиёзлар берилди.
Жамият ва армия бирлиги, ёшларни ҳарбий ватанпарварлик руҳида тарбиялаш ватан ҳимоячиларига шароит яратишда ҳарбий-маъмурий секторлар, давлат ва жамоат ташкилотлари ҳам иштирок этмоқда. Ёшларни ватанпарварлик руҳида тарбиялаш, мактабларда уларни чақирувга қадар бошланғич ҳарбий тайёрлашга эътибор кучайтирилмоқда.
Шубҳасиз, натижаларга ўта қийин шароитда, халқаро вазиятнинг кескинлашиб бораётган шароитида эришилди. Булар албатта бу йўналишдаги олиб борилаётган сиёсатнинг дастлабки натижалари. Ўз навбатида эришилаётган ютуқлар ҳар бир фуқарога фахр туйғусини бахш этиб, ватан учун, давлат учун олиб борилаётган ишларга дахлдорлик ҳиссини кучайтиради.
Сайфиддин Жўраев, сиёсий фанлар доктори, Тошкент шарқшунослик университети Халқаро муносабатлар кафедраси профессори
Изоҳ (0)