AQSH prezidenti Donald Trampning Oq uyga qaytishi va uning davlat rahbari sifatidagi ilk bayonotlari elektroshokka o‘xshaydi va Yevropani o‘z xavfsizligi hamda Ukraina kelajagi uchun mas’uliyatni o‘z zimmasiga olishi kerak. Bu haqda Fransiya prezidenti Emmanuel Makron Financial Times nashriga bergan intervyusida ma’lum qildi.
Bu elektroshok. Bizga assimetrik zarbalar, tashqi silkinishlar zarur, dedi Fransiya rahbari.
Uning fikricha, Trampning harakatlarini Yevropa ittifoqini o‘z mudofaasiga, iqtisodiy va texnologik tiklanishga sarmoya kiritishga undaydigan turtki sifatida baholash kerak. Yevropa davlatlari “mushaklarini kuchaytirishi” va bu masalalarga ko‘proq e’tibor qaratishi lozim:
Yevropa uchun bu tezlashish va harakat qilish payti, dedi Emmanuel Makron.
U Yevropa Amerika qurollariga, xususan, Patriot zenit-raketa komplekslariga qaramlikdan qutulishi lozimligini aytdi va hamkorlarni Fransiya—Italiya SAMP-T havo mudofaa tizimini xarid qilishga chaqirdi.
Bundan tashqari, biz to‘liq integratsiyalashgan Yevropa mudofaa, sanoat va texnologik bazasini ishlab chiqishimiz lozim, dedi u.
Ta’kidlanishicha, Makron AQSH va Rossiya rahbarlarining Ukrainadagi urushni tugatish bo‘yicha muzokaralariga Yevropa yetakchilariga qaraganda optimistik munosabatda bo‘lgan.
AQSHning vazifasi “bu muloqotni qayta boshlash” va tashabbusni o‘z qo‘liga olish, Yevropaning vazifasi esa Ukraina uchun xavfsizlik kafolatlarini va “kengroq ma’noda butun mintaqa xavfsizligi”ni muhokama qilishdan iborat, deya fikr bildirgan Makron.
U faqat Ukraina prezidenti Vladimir Zelenskiy o‘z mamlakati nomidan muzokaralar olib borishi mumkinligini ta’kidlab, “taslim bo‘lishga olib keladigan tinchlikka” yo‘l qo‘ymaslikka chaqirgan.
Hozirgi bosqichdagi yagona savol shundan iboratki, prezident Putin chindan ham shu asosda o‘t ochishni to‘xtatishga rozi bo‘lishga tayyormi? Shundan so‘ng ukrainliklar Rossiya bilan muzokaralar olib borishi zarur bo‘ladi, deya ta’kidladi u.
Izoh (0)