Yevropaning bir qator davlatlari Rossiya bilan kelajakdagi tinchlik bitimining bajarilishini ta’minlashga yordam berish maqsadida Ukrainaga qo‘shin yuborish rejasi ustida maxfiy tarzda ish olib bormoqda.
Associated Press (AP) ma’lumotlariga ko‘ra, yevropaliklar tegishli variantlarni taxminan bir yil oldin o‘rganishni boshlagan va bu harakatlar boshida Buyuk Britaniya hamda Fransiya turibdi.
AQSHning xavfsizlik ustuvorliklari boshqa sohalarga yo‘naltirilganidan tobora ko‘proq xavotirga tushayotgan Yevropa mamlakatlari guruhi Ukrainaga qo‘shin yuborish rejasi ustida yashirin ravishda ishlamoqda, deya xabar berdi AP.
Agentlik, shuningdek, AQSH yetakchisi Donald Tramp siyosati tufayli bu davlatlarda “shoshqaloqlik hissi” paydo bo‘lganini ta’kidlagan. Aniqlanishicha, tafsilotlar hozircha kam, biroq kuchlarning tarkibi va vazifasi tinchlik bitimi shartlari bilan belgilanadi, shuningdek, qisqa fursatda katta miqdordagi kontingentni to‘plash “shubhasiz imkonsiz bo‘ladi”.
Estoniya Mudofaa vaziri Xanno Pevkurga ko‘ra, rejalar juda boshlang‘ich bosqichda va yevropaliklar uchun chegara chizig‘i qanday bo‘lishini tushunish nihoyatda muhim. Bir necha kun oldin ushbu Boltiqbo‘yi davlatining tashqi ishlar vaziri Estoniya Ukraina uchun xavfsizlik kafolatlari bo‘yicha muzokaralar jarayonida ishtirok etishi shartligini ham ta’kidlagan edi.
Yaqinda Telegraph gazetasi Britaniya hukumatidagi manbalariga tayanib, Buyuk Britaniya va Fransiya rahbarlari Ukrainaga “tinchlikparvar kuchlar”ni birgalikda yuborish masalasini maxfiy tarzda muhokama qilayotganini yozgan edi. Gazeta ma’lumotiga ko‘ra, bosh vazir Kir Starmer hali tashabbusga to‘liq rozi emas.
Ukrainaga harbiylar yuborish haqida bir yildan buyon gapirishda davom etayotgan prezident Emmanuel Makron esa bu g‘oyani ilgari surishda davom etmoqda.
Avvalroq Pentagon rahbari Pit Xegset Bryusselda Ukraina bo‘yicha aloqa guruhi mudofaa vazirlari bilan “Ramshtayn” formatidagi uchrashuvda Amerika qo‘shinlari Kiyev xavfsizligining kafolati sifatida Ukraina hududiga joylashtirilmasligini aytgan edi. Uning so‘zlariga ko‘ra, NATO homiyligisiz Yevropa va Yevropaga tegishli bo‘lmagan qo‘shinlar ishtirokidagi missiya Ukraina xavfsizligi kafolatlarini ta’minlashi mumkin.
Aniqlik kiritaman: Amerika qo‘shinlari hech qanday xavfsizlik kafolatlari doirasida Ukraina hududiga joylashtirilmaydi, dedi Xegset.
Uning so‘zlariga ko‘ra, barqaror tinchlikka “urush qayta boshlanmasligini kafolatlovchi ishonchli xavfsizlik kafolatlarini” taqdim etish orqali erishish mumkin. U Ukrainaning NATOga a’zo bo‘lishi mojaroni diplomatik yo‘l bilan hal qilishning real natijasi bo‘lmasligini ta’kidlab, Ukraina uchun xavfsizlik kafolatlari “urushga layoqatli yevropalik yoki yevropalik bo‘lmagan harbiylar” tomonidan mustahkamlanishi kerakligini aytdi.
Agar bu qo‘shinlar Ukrainada biror vaqtda tinchlikparvar sifatida joylashtirilsa, ular NATOga a’zo bo‘lmagan missiyaning bir qismi sifatida joylashtirilishi kerak va ularga Shimoliy Atlantika paktining 5-moddasi qo‘llanilmasligi lozim, dedi u alyansning o‘zaro mudofaa qoidasini nazarda tutib.
“Ramshtayn” formatidagi yig‘ilishda so‘zga chiqqan siyosatchi, shuningdek, Ukrainani 2014-yilgacha mavjud bo‘lgan chegaralarga qaytarish imkoniyatini noreal deb baholadi.
Izoh (0)