Prezident Shavkat Mirziyoyev taklifiga binoan Iordaniya podshohi Abdulla II ibn al-Husayn 25-avgust kuni davlat tashrifi bilan mamlakatga keldi. Bu haqda Prezident matbuot xizmati xabar berdi.
Samarqand shahri aeroportida Iordaniya podshohini O‘zbekiston prezidenti Shavkat Mirziyoyev kutib olgan.
Oliy martabali mehmon sharafiga ikki mamlakat davlat bayroqlari ko‘tarildi, faxriy qorovul saf tortgan.
“Milliy kuy-qo‘shiq va raqslardan iborat tantanali marosim bo‘lib o‘tdi. Tashrifning asosiy tadbirlari ertaga rejalashtirilgan. Bugun davlat rahbarlari birgalikda qadimiy Samarqandning tarixiy obidalarini ziyorat qiladi”, deyiladi manbada.
Abdulla II 25—26-avgust kunlari O‘zbekistonda bo‘ladi. Samarqandda o‘tkaziladigan oliy darajadagi muzokaralarda siyosiy, savdo-iqtisodiy va investitsiyaviy hamkorlikni rivojlantirish masalalari ko‘rib chiqiladi.
Avvalroq Shavkat Mirziyoyev Samarqandga yetib borgani xabar qilingandi. Davlat rahbari tashrifini Imom Buxoriy maqbarasi ziyoratidan boshlagan.
Maqbara joylashgan ziyoratgoh ziyoratchilarga sharoitlarni kengaytirish maqsadida ulkan majmuaga aylanirilmoqda. Ziyoratgoh umumiy maydoni 44 gektar etib kengaytirilgan. Mo‘tabar maqbara, 10 ming kishilik masjid va maʼmuriyat binosi qurib bitkazilgan. Majmuaning to‘rt burchagidagi 75 metrlik minoralar o‘rnatilgan.
Izoh (0)