Turkmanistondan O‘zbekiston hududiga 1,3 milliard so‘mlik dizel noqonuniy o‘tkazilayotganda to‘xtatib qolindi, deb xabar bermoqda “O‘zenergoinspeksiya”.
Unga ko‘ra, holat “O‘zenergoinspeksiya” va Bojxona qo‘mitasi Buxoro viloyati boshqarmasi hamkorligida o‘tkazilgan nazorat tadbirida aniqlangan. Turkmanistondan O‘zbekiston hududiga noqonuniy tarzda dizel yonilg‘isini hujjatlarda “Bitumnaya mastika” tarzida ko‘rsatib olib kirishga bo‘lgan urinish fosh etildi.
Xususan, Buxoro viloyatidagi “Olot” chegara posti orqali og‘irligi 115 tonna (qiymati 1 mlrd 300 mln so‘mlik) hujjatlarda “Bitumnaya mastika” deya ko‘rsatilgan tovar “O‘zenergoinspeksiya” kimyo laboratoriyasi xulosasiga ko‘ra dizel yonilg‘isi ekani ma’lum bo‘ldi.
Mazkur qonunbuzarlik holati yuzasidan hujjatlar rasmiylashtirilib, ushbu yonilg‘i mahsulotlari vaqtincha saqlovga olindi.
Avvalroq Toshkent shahrining ikki tumanida dizel yonilg‘isini sotayotgan shaxslar ushlangani haqida xabar berilgandi. Shuningdek, Farg‘onada fuqaro uyida dizel yonilg‘isini texnik talablarga zid ravishda sotayotgani aniqlangandi.
Izoh (0)