Germaniya Ichki ishlar vazirligi harbiy mojaro yuzaga kelganda tinch aholi uchun bunkerlar ro‘yxatini ishlab chiqishga kirishdi. Bu haqda The Guardian nashri xabar berdi.
Qayd etilishicha, ushbu ro‘yxatga turli jamoat joylari, jumladan metro bekatlari, avtoturargohlar, davlat va xususiy mulk obyektlari kiradi. Ushbu hududlarga yetib borish mahalliy aholiga telefondagi maxsus ilova yordam beradi.
Maqolada taʼkidlanishicha, hukumat fuqarolarni yerto‘la va garajlarni obodonlashtirish orqali o‘z uylarida bunkerlar yaratishga undaydi.
Ma’lumotlarga ko‘ra, bugungi kunda 84 million aholiga ega Germaniyada deyarli yarim million fuqaroni qutqarishi mumkin bo‘lgan 579 ta bunker mavjud.
Avvalroq Bundesver Germaniya hukumatining maxfiy rejasiga asoslanib, Rossiya bilan urush boshlangan taqdirda mamlakatning yirik kompaniyalari o‘rtasida tushuntirish ishlarini olib borishga kirishgani haqida xabar berilgan edi.
Qayd etilishicha, hujjatning “Germaniya operativ rejasi” deb nomlangan asl nusxasi mingga yaqin sahifani o‘z ichiga oladi. Unda urush paytida himoyaga muhtoj bo‘lgan tuzilmalar va infratuzilma obyektlari sanab o‘tilgan. Shuningdek, Rossiyaning NATO sharqiy qanotidagi manyovrlari oqibatida mudofaa yoki keskinlik yuzaga kelganda, Germaniya yuz minglab qo‘shinlar uchun logistika markaziga aylanishi, asbob-uskunalar va dori-darmonlarni yetkazib berish uchun nima qilish kerakligi haqida ko‘rsatmalar mavjud.
FAZʼga ko‘ra, Gamburg Savdo palatasida bo‘lib o‘tgan yig‘ilishda harbiylar biznes vakillari bilan bevosita suhbatlashgan va har 100 nafar xodimga kamida beshta qo‘shimcha yuk mashinasi haydovchisini tayyorlashni tavsiya qilgan. Gamburg shtati qo‘mondoni, podpolkovnik Yorn Plishke ham kompaniyalarga avtonomiyaga intilishni, xususan, dizel generatorlari yoki o‘zlarining shamol turbinalaridan foydalanish, favqulodda vaziyatning batafsil rejasini tuzishni maslahat bergan.
Izoh (0)