Angliyaning “Tottenhem” klubi Janubiy Koreya terma jamoasi yetakchisi Son Hyon Min bilan xayrlashgach, “Real Madrid” futbolchisi Rodrigo Goes transferiga jiddiyroq qiziqa boshladi. Bu haqda Ispaniyaning AS nashri xabar bermoqda.
London klubi Songa yiliga 11 million yevrodan ortiq maosh to‘lab kelgan. U jamoani tark etgach, klub rahbariyati ushbu mablag‘ni Rodrigoning ish haqi sifatida to‘lashni rejalashtirmoqda.
“Tottenhem” ustozi Tomas Frank esa braziliyalik futbolchiga asosiy tarkibdan joy kafolatlanishini va’da bergan.
Rodrigoning “Real”ni tark etishi mumkinligi haqidagi xabarlar biroz avvalroq tarqalgandi. Sababi “qirollik klubi” ustozi Xabi Alonso unga to‘liq ishonch bildirmagandi. Ushbu holat ortidan futbolchining o‘zi ham “qaymoqranglilar”ni tark etishga tayyor. Madrid klubi esa bu transferdan maksimal daromad olishni ko‘zlamoqda.
- Ma’lumot uchun, 2024/25-yilgi mavsumda Rodrigo barcha musobaqalar doirasida jami 54 ta o‘yinda maydonga tushib, o‘z hisobiga 14 ta gol va 11 ta golli uzatma yozdirib qo‘ygan. Uning “Real” bilan shartnomasi 2028-yil yozigacha amal qiladi. Transfermarkt portali Rodrigoning transfer qiymatini 90 million yevroga baholamoqda.
Izoh (0)