O‘zbekistonda 2021-yil kuz va joriy yil bahor mavsumida jami 213 million dona manzarali, mevali daraxt va buta ko‘chatlari ekilishi tashkil etilgan. Bu haqda Ekologiya va atrof-muhitni muhofaza qilish davlat qo‘mitasining mutasaddilari ma’lum qildi.
Shuningdek respublikadagi yirik, o‘rta va kichik mahallalarda jami 70,8 million dona hamda umumiy foydalanishdagi avtomobil yo‘llari yoqalariga 72,5 million dona terak ko‘chat va qalamchalari ekilgan. Sug‘orish tizimini yaxshilash bo‘yicha 238 ta quduqlar qazilgan. Hududlarda ekilgan daraxt va butalarni sug‘orish, parvarish va muhofaza qilish maqsadida yuridik va jismoniy shaxslarga biriktirilgan.
Bundan tashqari, tuman (shahar)larda mavjud 740 ta suv tashish avtotransportlari ko‘chatlarni sug‘orish ishlariga jalb etilgan. Barcha mas’ul tashkilotlarga daraxt ko‘chatlarini parvarishlash bo‘yicha 10 577 ta majburiy ko‘rsatmalar berilib, ko‘rsatma talablarini lozim darajada bajarmagan 109 nafar mansabdor shaxslarga nisbatan 311 million so‘m miqdorida ma’muriy jarimalar qo‘llanildi.
Avvalroq Jahon banki O‘zbekistonda o‘rmonlarni tiklash uchun 142 million dollarlik kredit ajratishi, O‘zbekistonda daraxtlarni kesganlik, shikastlaganlik uchun jarima miqdorlari oshirilishi, O‘zbekistonda daraxtlarni noqonuniy kesganlarni foto va videoga olib yuborganlar mukofotlanishi to‘g‘risida xabar berilgandi.
Izoh (0)