Estoniya Rossiya bilan chegaradosh nazorat punktlaridan birida xavfsizlik choralarini kuchaytirdi. Bu haqda Estoniya milliy teleradiokompaniyasi xabar berdi.
Xususan, Narva shahridagi chegara nazorat punktida qurilish ishlari davom etmoqda. Estoniya va Rossiyani bog‘lovchi ko‘prikning bir qismiga ulkan metall darvoza o‘rnatilgan. Yaqin vaqt ichida zarurat tug‘ilganda chegara hududiga kirish va chiqishni to‘liq to‘sib qo‘yishga mo‘ljallangan ko‘chma metall to‘siqlarni ham o‘rnatish rejalashtirilgan.
Bu birinchi navbatda chegara punkti xavfsizligini oshirish uchun zarur. Taxminan besh yil oldin Rossiya tomonidan kelgan avtomobil mavjud to‘siqlarni yorib o‘tgan hodisa yuz bergan edi. To‘siqlar o‘rnatilishi ruxsatsiz o‘tishning oldini olishga yordam beradi.
Shuningdek, darvozalar o‘rnatilishi ko‘prikdagi vaziyatni yaxshiroq nazorat qilish imkonini beradi, masalan, muhojirlar oqimi yuzaga kelgan taqdirda, dedi Narva chegara nazorat punkti rahbari Antti Eensalu.
Iyun oyida Rossiya bilan chegaradosh bir qator Yevropa davlatlari sog‘liqni saqlash tizimlarini urush sharoitlariga tayyorlayotgani haqida xabarlar tarqalgan edi. Ular harbiy to‘qnashuv ehtimoli bo‘lsa, yuzaga keladigan inqirozli holatlarga tayyorgarlik ko‘rmoqda.
May oyida esa Estoniya Moskvadagi parad uchun uchayotgan samolyotlarga o‘z havo hududidan foydalanishni taqiqlagandi. Bu taqiq Kuba va Braziliya reyslariga ham ta’sir qilgan.
Izoh (0)