Rossiyaning barcha harbiy kemalari Suriyaning Tartus shahridagi bazani tark etdi. Bu haqda sun’iy yo‘ldosh tasvirlariga tayanib, BBC xabar berdi.
Ma’lum qilinishicha, 2-dekabr kuni kemalar bazada bo‘lgan. Ushbu obyekt rasmiy ravishda Rossiya harbiy-dengiz kuchlarining Suriyadagi moddiy-texnik ta’minoti punkti deb ataladi. Rossiyalik harbiylar u to‘laqonli harbiy baza emasligini ta’kidlaydi.
Odatda harbiy kemalar ko‘rfazning eng yaqin joyidagi katta pirs yonida to‘xtaydi. 3-dekabr kuni olingan sun’iy yo‘ldosh suratidan ko‘rinib turibdiki, bandargohda birorta ham yirik kema yo‘q.
1-dekabr kuni bandargohda uchta harbiy kema ko‘rinish bergan. Ular fuqaro kemalaridan kulrang rangi va shakli bilan farqlanadi, sababi torroq hisoblanadi.
Dastlab Rossiya kemalari Tartusni tark etayotgani haqida OSINT harbiy tahlilchisi H.I.Satton ma’lumot bergandi.
Kemalardan biri, “Yelnya” yordamchi kemasi 2024-yil 2-dekabr kuni tongda Tartusni tark etayotgani kuzatilgan. Boshqa barcha yoki ba’zi kemalar ham shaharni tark etgani haqida ma’lumotlar bor, degan u.
“Yelnya”ning Tartusdan chiqib ketayotgani to‘g‘risida Droxford Maritime harbiy-tahliliy blogi ham ma’lumot bergan.
Rossiya Mudofaa vazirligi sentyabr oyida O‘rta Yer dengizidagi zarba guruhi tarkibida “Admiral Grigorovich” fregati, “Merkuriy” korveti, “Sovet Ittifoqi floti admirali Gorshkov” va "Ufa" dizel-elektr suvosti kemasi borligini ma’lum qilgandi.
Soyalari va o‘lchamlariga qaraganda, 1-dekabr kuni Tartusdagi baza qirg‘og‘ida “Grigorovich”, “Merkuriy” va “Gorshkov” kemalari langar tashlab turgan bo‘lishi mumkin.
Muhim obyekt
Endilikda Rossiya harbiy-dengiz floti o‘z kemalarini Qora dengizga yubora olmaydi, chunki Turkiya urush sababli harbiy kemalar uchun bo‘g‘ozlarni yopib qo‘ygan. Yana bir muhim obyekt Xmeymim harbiy-havo bazasidir.
Harbiy mutaxassislar fikricha, Tartusdagi harbiy va ta’minot kemalarining olib chiqilishi Rossiya qo‘mondonligining ularning xavfsizligini ta’minlashga bo‘lgan ishonchsizligini ko‘rsatishi mumkin.
Boshqa tomondan, BBC o‘rgangan Planet Labs tomonidan 29-noyabr kuni olingan sun’iy yo‘ldosh tasvirida, rus harbiy-dengiz kuchlari foydalanadigan kemalar to‘xtash joyi yaqinida bir harbiy kemaning turgani ko‘rinadi.
Izoh (0)