Kelasi yildan mamlakatda ayrim soliq stavkalari o‘zgarishsiz qolishi, ba’zilari pasaytirilishi va oshirilishi xabar qilindi.
Iqtisodiyot va moliya vazirligi 2025-yil uchun soliq siyosatining asosiy yo‘nalishlarini maʼlum qildi. Unga ko‘ra, kelasi yilda O‘zbekistonda quyidagi asosiy soliq stavkalari o‘zgarishsiz qoldiriladi:
- foyda solig‘i (15 foiz);
- qo‘shilgan qiymat solig‘i (12 foiz);
- jismoniy shaxslardan olinadigan daromad solig‘i (12 foiz);
- yuridik shaxslar mol-mulk solig‘i (1,5 foiz);
- aylanmadan olinadigan soliq (4 foiz).
Shu bilan birga, ayrim turdagi soliq stavkalari o‘zgaradi. Xususan, yakka tartibdagi tadbirkorlarning yollanma xodimlari uchun ijtimoiy soliq 1 yilga BHMning 6 baravaridan 1 baravariga pasaytiriladi. Mobil aloqa xizmatlari uchun aksiz solig‘i bekor qilinadi.
Elektron tijorat ishtirokchilari uchun foyda solig‘i stavkalari esa 7,5 foizdan 10 foizga, aylanmadan olinadigan soliq stavkasi 2 foizdan 3 foizga oshirilmoqda.
Vazirlik axborotiga ko‘ra, iqtisodiyotning barcha tarmoqlari, jumladan sanoat, xizmatlar va qurilish sohalari uchun suv solig‘i stavkasi tenglashtirilmoqda. Bunda, qishloq xo‘jaligi yerlarini sug‘orish va baliqlarni yetishtirish (o‘stirish) uchun suv resurslaridan foydalanganlik uchun soliq (100 so‘m) o‘zgarishsiz qolmoqda.
Import qilingan tabiiy gazni isteʼmolchilarga realizatsiya qilishda aksiz solig‘i solinmasligi bo‘yicha tartibni bekor qilgan holda, aksiz solig‘i stavkasini 20 foizdan 12 foizgacha pasaytirish rejalashtirilmoqda.
Yana qaysi soliqlar oshiriladi?
Avvalroq Iqtisodiyot va moliya vazirligi 2025-yil 1-apreldan neft mahsulotlari uchun to‘lanadigan aksiz soliq stavkalarini 10 foizga oshirishni rejalashtirayotgani xabar qilingan. Mazkur tarkibga benzin, aviakerosin, dizel va EKO dizel yonilg‘isi, dizel yoki karbyurator (injektor) dvigatellari uchun motor moyi hamda yakuniy isteʼmolchiga realizatsiya qilinadigan benzin, dizel yonilg‘isi, suyultirilgan va siqilgan gaz kiradi.
2025-yil 1-yanvardan suv resurslaridan foydalanganlik uchun soliq stavkalarida quyidagilar taklif etilmoqda:
- elektr stansiyalari, kommunal xizmat ko‘rsatish korxonalari, alkogolsiz ichimliklar hamda alkogol mahsulotlari (pivo va vinodan tashqari) ishlab chiqaruvchilar hamda sanoat korxonalari uchun foydalaniladigan suv hajmiga qo‘llanadigan soliq stavkalarini o‘rtacha 10 foizga indeksatsiya qilish;
- kon-kimyo xomashyosi hamda boshqa noruda qurilish materiallari uchun qazib olingan hajmga belgilangan qatʼiy miqdorlarni 10 foizga indeksatsiya qilish.
Kelasi yil 1-yanvardan yuridik va jismoniy shaxslarning turar hamda noturar ko‘chmas mulk obyektlariga solinadigan mol-mulk solig‘i stavkalarini 10 foizga oshirish rejalashtirilmoqda. Shu bilan birga, yuridik va jismoniy shaxslardan olinadigan yer solig‘ining bazaviy stavkalari o‘rtacha 10 foizga indeksatsiya qilinadi.
2025-yil 1-yanvardan yakka tartibdagi tadbirkorlarning qatʼiy belgilangan miqdorlardagi soliq stavkalarini inflyatsiya darajasidan kelib chiqib 10 foizga oshiriladi. Shu sanadan boshlab mol-mulkni ijaraga beruvchi jismoniy va yuridik shaxslar uchun soliq solish maqsadida qo‘llanadigan ijara to‘lovining eng kam stavkalari 10-12 foizga indeksatsiya qilish belgilanmoqda.
Izoh (0)