O‘zbekistonda 2023-yilning 6 oyida elektr energiyasidan noqonuniy foydalanish tufayli 78,5 milliard so‘m, tabiiy gazdan noqonuniy foydalanish sababli esa 231 milliard 866 million so‘m zarar ko‘rilgan. Bu haqda Energetika vazirligi axborot xizmati rahbari Hasan Toshxo‘jayev ma’lum qildi.
Tahlillarga ko‘ra, yanvar—iyun oylarida O‘zbekistonda 438,7 ming tonna suyultirilgan gaz, 649,6 ming tonna avtobenzin, 536,7 ming tonna dizel yoqilg‘isi, 78,4 ming tonna mazut, 197,8 ming tonna polietilen va 38,1 ming tonna polipropilen ishlab chiqarildi.
O‘tkazilgan nazorat tadbirlari davomida 2 695 ta iste’molchi tomonidan jami 242 million 213 ming kubometr tabiiy gazdan noqonuniy foydalanish holatlari aniqlangan. Buning natijasida gaz ta’minoti korxonalariga yetkazilgan zarar miqdori 231 milliard 866 million so‘mni tashkil qilmoqda.
Yanvar—iyul oylarida iste’molchilarga 12 milliard 146 million kilovatt/soat elektr energiyasi yetkazib berildi. Bu o‘tgan yilning mos davriga nisbatan 1 milliard 100 million kilovatt/soat yoki 9,6 foizga ko‘p.
Iste’molchilarga elektr energiyasi yetkazib berish sifatini yaxshilash maqsadida respublika miqyosida 748 ta transformator punkti almashtirildi, 7 ming 548 ta transformator punkti ta’mirdan chiqarildi.
Vazirlik huzuridagi “O‘zenergoinspeksiya” bergan ma’lumotlarga ko‘ra, iyul oyida 573 ta holatda isteʼmolchilar tomonidan tabiiy gaz va elektr energiyasidan noqonuniy foydalanish holatlari aniqlandi. Noqonuniy foydalanishning eng ko‘p holatlari Andijon, Samarqand, Navoiy va Toshkent viloyatlari hissasiga to‘g‘ri keladi.
Qoidabuzar isteʼmolchilarga nisbatan belgilangan tartibda choralar ko‘rilib, tegishli hujjatlar huquqni muhofaza qiluvchi organlarga taqdim etildi.
Izoh (0)