Toshkent shahri va viloyatida neft mahsulotlaridan noqonuniy foydalanish holatlari aniqlandi, deb xabar bermoqda Energetika vazirligi matbuot xizmati.
Qayd etilishicha, O‘zneftgazinspeksiya”, huquqni muhofaza qiluvchi organlar va ishchi guruh a‘zolari bilan 16-dekabr kuni o‘tkazilgan nazorat tadbirlarida Toshkent viloyatining Toshkent tumanidagi avtoturargohda neft mahsulotlari fuqarolar hayotini xavfga qo‘ygan holda saqlanayotgani aniqlangan.
“Qoplonbek” chegara posti yaqinida joylashgan ushbu avtoturargohda bo‘lgan 86 dona 10 litrlik nostandart yelim idishlarda jami 860 litr neft mahsulotlari yong‘in va texnika xavfsizligi qoidalariga zid ravishda, fuqarolarning hayotini xavfga qo‘ygan holda saqlab kelingan.
Toshkent shahrining Bektemir tumani, Chirchiq bo‘yi ko‘chasida joylashgan Heting oil MCHJga qarashli hududda esa nostandart metall sig‘imlar va yelim idishlar hamda sintetik qoplarda saqlanayotgan jami 27 980 litr neft mahsulotlari shunday holatda saqlanayotgani ma’lum bo‘lgan.
Hozirda ushbu holat bo‘yicha huquqni muhofaza qiluvchi organlar tomonidan tergovga qadar tekshiruv harakatlari o‘tkazilmoqda.
Energetika vazirligi tadbirkor va fuqarolarni neft mahsulotlarini noqonuniy saqlash, tashish va sotishdan ogohlantirdi.
“Bu kabi noqonuniy holatlar aniqlanganda, birinchidan, aniqlangan neft mahsulotlari musodara bo‘ladi. Shuningdek, fuqarolarga bazaviy hisoblash miqdorining ikki baravaridan besh baravarigacha, mansabdor shaxslarga esa — besh baravaridan o‘n baravarigacha miqdorda jarima solishga sabab bo‘ladi. Qolaversa, yuqoridagi kabi qoidabuzarliklarga yo‘l qo‘ygan shaxslar huquqni muhofaza qiluvchi organlar tomonidan ma’muriy yoki jinoiy javobgarlikka tortilishini eslatib o‘tamiz”, — deyiladi vazirlik xabarida.
Mavzuga doir: Toshkentda avtobenzin va dizel yoqilg‘isini noqonuniy ravishda sotib kelgan fuqarolar qo‘lga tushdi
Izoh (0)