Bundesver Germaniya hukumatining maxfiy rejasiga asoslanib, Rossiya bilan urush boshlangan taqdirda mamlakatning yirik kompaniyalari o‘rtasida tushuntirish ishlarini olib borishga kirishdi. Bu haqda Frankfurter Allgemeine Zeitung (FAZ) nashri manbalarga tayanib xabar berdi.
Qayd etilishicha, hujjatning “Germaniya operativ rejasi” deb nomlangan asl nusxasi mingga yaqin sahifani o‘z ichiga oladi. Unda urush paytida himoyaga muhtoj bo‘lgan tuzilmalar va infratuzilma obyektlari sanab o‘tilgan. Shuningdek, Rossiyaning NATO sharqiy qanotidagi manyovrlari oqibatida mudofaa yoki keskinlik yuzaga kelganda, Germaniya yuz minglab qo‘shinlar uchun logistika markaziga aylanishi, asbob-uskunalar va dori-darmonlarni yetkazib berish uchun nima qilish kerakligi haqida ko‘rsatmalar mavjud.
FAZʼga ko‘ra, yaqinda Gamburg Savdo palatasida bo‘lib o‘tgan yig‘ilishda harbiylar biznes vakillari bilan bevosita suhbatlashgan va har 100 nafar xodimga kamida beshta qo‘shimcha yuk mashinasi haydovchisini tayyorlashni tavsiya qilgan. Gamburg shtati qo‘mondoni, podpolkovnik Yorn Plishke ham kompaniyalarga avtonomiyaga intilishni, xususan, dizel generatorlari yoki o‘zlarining shamol turbinalaridan foydalanish, favqulodda vaziyatning batafsil rejasini tuzishni maslahat bergan.
Biznes vakillari bilan uchrashuvlar
Gamburgda Bundesver vakili bilan yana bir uchrashuv bo‘lib o‘tdi, unda “mutlaqo aniq savollar”, xususan, “ittifoqchi qo‘shinlar shahar orqali kirsa, Elba daryosi to‘sib qo‘yilgan bo‘lsa, temiryo‘l tarmog‘iga hujum qilinib, elektr energiyasi yo‘qligi sababli do‘konlar faoliyatini to‘xtatsa nima qilish kerak” kabilar muhokama qilingan.
Plishkening so‘zlariga ko‘ra, biznes vakillari bilan bunday uchrashuvlar butun Germaniya bo‘ylab o‘tkaziladi. Bundesver barcha mintaqaviy qo‘mondonliklarga ushbu vazifalarni bajarish yuklatilganini aytgan.
“Rossiya allaqachon urushga tayyorgarlik ko‘rishni boshlagan”, deya ishonch bilan fikr bildirgan Plishke.
U razvedka ma’lumotlariga asoslanib, to‘rt-besh yildan keyin Rossiya G‘arbda navbatdagi hujumga tayyor bo‘lishini taxmin qilmoqda.
Nemis nashrining qayd etishicha, “Germaniya operativ rejasi” hali tugallanmagan, u fuqarolik tuzilmalari hamda Bundesver o‘rtasidagi qo‘shma mashg‘ulotlar natijalariga ko‘ra to‘ldiriladi. Ushbu mashqlarning birinchi bosqichida razvedka va qo‘poruvchilik harakatlarining oldini olish uchun port obyektlarini himoya qilish amaliyoti o‘tkazildi. Ikkinchi bosqich, nashr yozganidek, ancha katta bo‘lishi kutilmoqda.
Izoh (0)