Туркманистондан Ўзбекистон ҳудудига 1,3 миллиард сўмлик дизель ноқонуний ўтказилаётганда тўхтатиб қолинди, деб хабар бермоқда “Ўзэнергоинспекция”.
Унга кўра, ҳолат “Ўзэнергоинспекция” ва Божхона қўмитаси Бухоро вилояти бошқармаси ҳамкорлигида ўтказилган назорат тадбирида аниқланган. Туркманистондан Ўзбекистон ҳудудига ноқонуний тарзда дизель ёнилғисини ҳужжатларда “Битумная мастика” тарзида кўрсатиб олиб киришга бўлган уриниш фош этилди.
Хусусан, Бухоро вилоятидаги “Олот” чегара пости орқали оғирлиги 115 тонна (қиймати 1 млрд 300 млн сўмлик) ҳужжатларда “Битумная мастика” дея кўрсатилган товар “Ўзэнергоинспекция” кимё лабораторияси хулосасига кўра дизель ёнилғиси экани маълум бўлди.
Мазкур қонунбузарлик ҳолати юзасидан ҳужжатлар расмийлаштирилиб, ушбу ёнилғи маҳсулотлари вақтинча сақловга олинди.
Аввалроқ Тошкент шаҳрининг икки туманида дизель ёнилғисини сотаётган шахслар ушлангани ҳақида хабар берилганди. Шунингдек, Фарғонада фуқаро уйида дизель ёнилғисини техник талабларга зид равишда сотаётгани аниқланганди.
Изоҳ (0)