O‘zbekiston Konstitutsiyasining 33 yilligi munosabati bilan Toshkent—Buxoro—Toshkent yo‘nalishida yangi poyezd qo‘yilishi rejalashtirilgan, deb xabar bermoqda “O‘ztemiryo‘lyo‘lovchi” matbuot xizmati.
Ma’lum qilinishicha, mazkur dizel poyezdi “Toshkent yo‘lovchi vagonlarini qurish va ta’mirlash zavodi” AJ va “O‘ztemiryo‘lyo‘lovchi” AJ shartnomasi asosida qurilgan bo‘lib, tarkibi 12 ta vagondan iborat. Bunda 2 ta VIP, 4 ta biznes, 4 ta ekonom, 1 ta restoran va 1 ta dizel vagonlari bor (biznes-klass o‘rindiqlari yo‘nalish bo‘yicha o‘zgaradi). Hozirda poyezd mazkur yo‘nalishda sinovdan o‘tkazish jarayonida.
Poyezd harakat vaqti 6 soatdan iborat bo‘lib, 592 kilometr masofani bosib o‘tadi. Yangi dizel poyezdi sinovi yakunlangach, yaqin kunlarda yo‘lovchilarga foydalanish uchun topshiriladi.
Qayd etilishicha, vagonlar afzalliklari ularning qulayligidan tashqari, yozda sovitish tizimi boshqa vagonlardan farqli ravishda ular to‘xtab turganda ham ishlashda davom etadi.
Bundan avval 2025-yilning yozidan Toshkentdan Issiqko‘lga poyezd qatnovi yo‘lga qo‘yilishi haqida xabar berilgandi.
O‘zgalar parvarishiga muhtoj bo‘lgan yolg‘iz yashovchi hamda yolg‘iz keksalar va nogironligi bo‘lgan shaxslar reyestriga kiritilgan shaxslarga temiryo‘l transporti uchun bir yilda bir marta bepul chiptalar beriladi.
Izoh (0)