Funksional uy va maxfiy boshpana: Mark Sukerberg qanday uyda yashaydi?

Facebook asoschisi Mark Sukerberg doimiy ravishda ommaviy axborot vositalarining diqqat markazida. Axborot imperiyasi rahbari siyosatda ham faol, u Threads platformasini rivojlantirdi, bundan tashqari, sport bilan muntazam shug‘ullanadi. Xo‘sh axborot va media olami yetakchisi qayerda yashaydi?

Spartan uslubidagi beshta xona

Amerikalik media magnat, internet-tadbirkor va xayriyachi 1984-yilda Nyu York yaqinidagi Uayt Pleyns shahrida tug‘ilgan. Uning otasi stomatolog, onasi esa psixiatr edi. Markning o‘zi dastlab psixolog bo‘lishni xohlardi, lekin universitetda o‘qiyotganda u ITga mukkasidan ketgan va o‘zini butunlay dasturlashga bag‘ishlagan.

Mark Sukerberg ko‘p yillardan beri Kaliforniyaning Palo Alto shahrida, o‘z kompaniyasining shtabi yaqinida yashaydi. Milliarder har qanday ko‘chmas mulkni sotib olishga qurbi yetishi mumkinligiga qaramay, uning 7,6 million dollarlik uyi juda kamtarona.

Facebook bosh direktorining uyi 5 ta yotoqxona va 5 ta yuvinish xonasi, mehmonxona va oshxonadan iborat. Standart bino kompaniya shtab-kvartirasidan atigi 10 daqiqalik masofada joylashgan. Amerika OAV media magnati uyining bezaklari spartaliklarga o‘xshaydi bunga sabab Mark Sukerberg hashamatli interyerlar va dizayn tarafdori emas.

Sukerbergning ikki qavatli uyi devorlari oq rangda. Bino atrofi daraxtlar bilan o‘ralgan. Hovli saranjom-sarishta, maysalar hafsala bilan o‘rilgan va hovli ro‘parasida basseyn joylashgan.

Qizig‘i shundaki, uyni sotib olganidan ko‘p o‘tmay Mark Sukerberg qo‘shni binolardan to‘rttasini ham sotib oldi. Ularni ilgari egalik qilgan oilalarga ijaraga berdi. Bu esa u qo‘shni uylarni muxlislar sotib olishini istamasligi bilan izohlanadi.

Mark Sukerberg u yerda oilasi — rafiqasi va uch farzandi bilan yashaydi.

Funksional va ixcham

Milliarder o‘z uyi suratini tarmoqqa unchalik tez-tez joylashtirmasa-da, barcha xonalar ixcham, sodda va funksional tarzda jihozlanganini ko‘rish mumkin.

Uyda derazalar va chiroqlar ko‘p. Keng oshxona zaytun rangidagi minimalistik mebellar va kerakli texnikalar bilan jihozlangan.

Mehmonxona devorlari oq rangga bo‘yalgan. Tokchalar va kamin ham qordek oppoq. Ushbu neytral fonda tabiiy yog‘ochdan yasalgan mebel ajralib turadi.

Masalan, xonaning o‘rtasida qadimiy sandiq joylashgan bo‘lib, Sukerberg undan tumba shaklida foydalanishni yaxshi ko‘radi.

Kichkinagina jurnal stoli va katta ovqatlanish stoli ham tabiiy yog‘ochdan yasalgan.

Uydagi yuvinish xonalari ham did bilan jihozlangan.

Ularni bezashda mashhur Karrar marmaridan foydalanilgan. Ushbu mashhur materialdan Mikelanjelo o‘zining haykallarini yasashda ishlatgan.

Bu ajoyib uyning yana bir xususiyati — ochiq va oynavand ayvonlarning ko‘pligidir.

Ularning har biriga qulay, yumshoq mebel joylashtirilgan va dam olish uchun ajoyib joyga aylantirilgan.

Hovlidagi keng shiyponchada Sukerberg oilasi bilan dam olishni va do‘stlari bilan uchrashishni yaxshi ko‘radi.

Yaqinda ma’lum bo‘ldiki, Mark Sukerberg orolda turar joy binolari, ofislar, sport infratuzilmasi va hatto yerosti boshpanalari bo‘lgan maxfiy kompleks qurmoqda. Kompleksning taxminiy qiymati 270 million dollarni tashkil etadi.