Канада ва Мексикадан импорт учун 25 фоизли божнинг жорий этилиши савдо урушини бошлашга эмас, балки наркотрафикка қарши курашга қаратилган, дея маълум қилди Оқ уйнинг иқтисодиёт бўйича маслаҳатчиси Кевин Хессетт CNBC телеканали эфирида.
Ушбу ҳикоя мутлақо нотўғри талқин қилинмоқда. Сиз президент Трампнинг фармонини қайта ўқиб чиқишингиз керак, унда бу савдо уруши эмас, балки гиёҳванд моддаларга қарши уруш экани аниқ айтилган, деди у.
Хессетнинг айтишича, гиёҳванд моддалар, айниқса фентанил оқими АҚШга Канада ва Мексика чегаралари орқали кириб келмоқда ва ўтган йилнинг ўзида бунинг оқибатида 100 мингга яқин америкалик ҳалок бўлган.
Мексикаликларнинг 80, 90, ҳатто 95 фоизи гиёҳванд моддаларга қарши курашни қўллаб-қувватламоқда. Канадада ҳам аҳвол худди шундай, дея қўшимча қилди у.
Маслаҳатчининг таъкидлашича, Мексика аллақачон АҚШга Трамп талабларига жиддий муносабатда эканлигини ва чегарадан наркотик моддалар ўтказилишига қарши курашни кучайтиришга тайёрлигини маълум қилган.
Яхши хабар шуки, дам олиш кунларидаги музокараларимиз давомида мексикаликлар президент Трамп фармонини бажаришга жуда жиддий ёндашаётганини ва наркотик моддаларга қарши курашда анча қатъийроқ ҳаракат қилишга тайёр эканликларини кузатдик. Бироқ, канадаликлар унинг тўғридан-тўғри маъносини нотўғри тушунганга ўхшайди ва вазиятни савдо уруши сифатида қабул қилмоқда, дея таъкидлади Хессетт.
Аввалроқ АҚШ етакчиси Канада ва Мексикадан импорт қилинадиган маҳсулотларга 25 фоизлик бож тўлови жорий этилишини эълон қилган эди. У буни АҚШга жанубий ва шимолий чегаралар орқали кириб келаётган наркотик моддаларга қарши курашни кучайтириш зарурати билан изоҳлаган.
Мексика Трамп божларига “Б” режа билан жавоб қайтаради
Мексика президенти Клаудия Шейнбаум Трамп томонидан унинг товарларига 25 фоизлик бож жорий этилганига жавобан шунга ўхшаш ва яна бир қатор чораларни кўришини айтди.
Иқтисодиёт вазирига Мексика манфаатларини ҳимоя қилиш учун тариф ва нотариф чораларни ўз ичига олган Б режасини амалга оширишни топшираман. Ҳеч нарсани зўрлик билан қилма, ҳаммасини ақл-идрок билан қил. Оқ уйнинг бизнинг ҳудудимизга ҳар қандай тажовузларини ва жиноий ташкилотлар билан алоқадорликда айбланган Мексика ҳукуматига нисбатан туҳматини қатъиян рад этамиз, деди Шейнбаум.
Мексика президенти АҚШни фентанилга қарши курашда ҳамкорлик қилишга чақирди ва Мексика қўшни давлатлар билан қарама-қаршиликни истамаслигини таъкидлади. Шейнбаумнинг таъкидлашича, Мексика гиёҳванд моддалар савдосига қарши кураш чораларини кўрмоқда: тўрт ой мобайнида мамлакат ҳукумати 40 тоннадан ортиқ гиёҳванд моддаларни, жумладан 20 миллион доза фентанилни мусодара қилган. У АҚШга мамлакат ичида ушбу муаммога қарши курашишни маслаҳат берди: Америка шаҳарларида гиёҳванд моддалар савдосининг олдини олиш ва бундай операциялардан олинган маблағларни легаллаштириш учун жазолаш чораларини кўриш лозим.
Изоҳ (0)