Donald Tramp ma’muriyati qariyb 2 million nafar davlat xizmatchilariga davlat muassasalari shtatlarini qisqartirish niyati haqida ma’lum qildi va xohlovchilarga sakkiz oy davomida ish haqi hamda boshqa imtiyozlarni saqlab qolgan holda o‘z ixtiyori bilan ishdan ketish imkoniyatini taqdim etdi.
Xabarda aytilishicha, ko‘pchilik davlat muassasalarida shtatlar qisqartirilishi ehtimoli yuqori, masofadan ishlayotgan xodimlardan ofislardagi ish o‘rinlariga qaytish talab qilinadi, xizmatchilarning sezilarli qismining maqomi o‘zgartiriladi, bu esa ularni qisqartirish yoki ishdan bo‘shatish jarayonini osonlashtiradi.
Rasmiylarning hisob-kitoblariga ko‘ra, 5 foizdan 10 foizgacha davlat xizmatchilari ushbu taklifdan foydalanishlari mumkin, bu esa 100 milliard dollargacha mablag‘ni tejash imkonini beradi. Mazkur taklif harbiy xizmatchilar va milliy xavfsizlik bilan bog‘liq tuzilmalar xodimlariga taalluqli emas.
New York Times gazetasi Oq uyning bu ushbu qarorini “federal byurokratiyaga qarshi to‘g‘ridan-to‘g‘ri hujum” deb baholadi. Davlat xizmatlari shtatlarini qisqartirish, jumladan, vazirliklar sonini kamaytirish Donald Trampning saylovoldi va’dalaridan biri edi.
Davlat xizmatchilarini birlashtiruvchi kasaba uyushmasi rahbari Tramp ma’muriyati tashabbusini keskin tanqid qildi. U buni “federal hukumatni tozalash” deb atadi va mazkur harakat me’yorida ishlaydigan hukumat xizmatlariga qaram bo‘lgan amerikaliklar uchun salbiy oqibatlarga olib kelishi haqida ogohlantirdi.
Tahlilchilarning ta’kidlashicha, Tramp ma’muriyati ushbu tashabbusni amalga oshirishda to‘siqlarga duch kelishi mumkin, chunki federal qonunlar qisqartirilayotgan xodimlarga Oq uy taklif qilganidan ancha kam miqdorda to‘lovlarni belgilaydi. Bundan tashqari, hukumat davlat xizmatchilarini qisqartirish va ishdan bo‘shatish imkoniyatini sezilarli darajada cheklaydigan mehnat jamoa shartnomalari bilan hisoblashishga majbur bo‘ladi.
Izoh (0)