Kambodja bosh vaziri Xun Sen koronavirusga topshirgan testi musbat natija berdi, u G20 sammiti bo‘lib o‘tayotgan Balidan o‘z yurtiga qaytib ketishga qaror qildi. Bu haqda Xun Sen Facebook’dagi sahifasi orqali ma’lum qildi, deb yozadi Bloomberg.
Kambodja bosh vaziri 14-noyabr kuni test topshirgan, virusga chalinganini 15-noyabr kuni ertalab indoneziyalik shifokor ham tasdiqlagan. Xun Sen koronavirusni qachon va qanday yuqtirib olganini bilmasligini, ammo o‘zini yaxshi his qilayotganini aytdi.
Xun Sen avvalroq Kambodjada o‘tkazilgan Sharqiy Osiyo sammitida Amerika prezidenti Jo Bayden bilan uchrashgan edi. Ular dastlab ikki tomonlama sessiya o‘tkazgan, so‘ng AQSH delegatsiyasining Janubi-Sharqiy Osiyo davlatlari assotsiatsiyasi (ASEAN) bilan uchrashuvida ko‘rishgan. Shundan keyin Bayden va Xun Sen uzoq vaqt davom etgan tantanali ziyofat chog‘ida yonma-yon o‘tirgan, deb yozadi agentlik.
Biroq Oq uy xabariga ko‘ra, 15-noyabr kuni ertalab Bayden koronavirusga topshirgan test manfiy natija bergan.
Shuningdek, Xun Sen Rossiya tashqi ishlar vaziri Sergey Lavrov, Indoneziya prezidenti Joko Vidodo, Xitoy Davlat kengashi bosh vaziri Li Ketsyan, BMT bosh kotibi Antoniu Guterrish va boshqa mamlakatlar yetakchilari bilan yuzma-yuz ko‘rishgan.
G20 sammiti boshlandi
Indoneziyaning Bali orolida bugun, 15-noyabr kuni G20 mamlakatlari yetakchilarining sammiti boshlandi.G20 tarkibiga Argentina, Avstraliya, Braziliya, Buyuk Britaniya, Germaniya, Hindiston, Indoneziya, Italiya, Kanada, Xitoy, Meksika, Rossiya, Saudiya Arabistoni, AQSH, Turkiya, Fransiya, Janubiy Koreya, Janubiy Afrika, Yaponiya va Yevropa Ittifoqi kiradi.
G20 ga a’zo bo‘lmasa-da, sammitga Ukraina prezidenti Vladimir Zelenskiy ham taklif qilingan. Dastlab Zelenskiy agar G20 sammitida Rossiya prezidenti Vladimir Putin ishtirok etsa, unda qatnashishdan bosh tortishini ma’lum qilgandi.
Keyinroq Kreml ish jadvali va Rossiyada bo‘lish zarurati bilan bog‘liq holda Vladimir Putin G20 da qatnashmasligini ma’lum qildi. Bloomberg qayd etishicha, Putin Ukraina bilan mojaro fonidan boshqa davlat yetakchilarining “sovuq nigohlaridan qochish” uchun sammitda qatnashishdan bosh tortgan. Uning o‘rniga Rossiya delegatsiyasiga mamlakat tashqi ishlar vaziri Sergey Lavrov boshchilik qilmoqda.
Zelenskiy sammitda onlayn qatnashmoqda.
Balida yana kimlarning mazasi qochdi?
14-noyabr kuni Associated Press Rossiya tashqi ishlar vaziri Sergey Lavrov G20 sammiti uchun Baliga yetib kelganidan keyin kasalxonaga yotqizilgani haqida xabar berdi. Agentlikning Indoneziya rasmiylari orasidagi manbalariga ko‘ra, rossiyalik diplomat Balida yurak xastaligi bilan bog‘liq muolaja olgan.O‘z navbatida, Bali gubernatori Reuters agentligiga Lavrovning sog‘-salomat ekani va shifoxonaga tibbiy ko‘rikdan o‘tish uchun qisqa muddatga tashrif buyurganini aytgan.
Rossiya TIV rasmiy vakili Mariya Zaxarova Lavrovning Balidagi kasalxonaga yotqizilgani haqidagi xabarlarni “feyk” deb atadi. Zaxarova Telegram’ga vazirning videosini ham joylashtirdi.
Shuningdek, Argentina prezidenti Alberto Fernandes Balidagi G20 sammitida o‘zini yomon his qilgan.
Argentina prezidenti shifokorining bayonotida aytilishicha, Fernandesning qon bosimi tushib, boshi aylana boshlagan. U ko‘rikdan o‘tkazilgan.
Clarin nashrining yozishicha, G20 sammitining birinchi kunida Fernandes o‘rniga Argentinadan tashqi ishlar vaziri Santyago Kafiyero vakillik qiladi.
Izoh (0)