Халқаро жиноий суд (ХЖС) прокурори Карим Хон “Толибон” ҳаракати раҳбарларини ҳибсга олиш учун ордер сўради, деб хабар бермоқда CNN.
“Толибон” олий раҳбари Ҳайбатулла Охундзода ва Афғонистон Ислом Амирлиги бош судьяси Абдул Ҳаким Ҳаққонийни инсониятга қарши жинсий таъқиб билан боғлиқ жиноятлари учун жиноий жавобгарликка тортишга ишончли асослар бор”, дейилади прокуратура баёнотида.
Хоннинг таъкидлашича, “Толибон”га мухолифат шахслар “қотиллик, қамоққа олиш, қийноққа солиш, зўрлаш ва жинсий зўравонликнинг бошқа шакллари ҳамда бошқа ғайриинсоний хатти-ҳаракатлар каби жиноятларни содир этиш орқали шафқатсиз равишда бостирилмоқда.
ХЖС прокурори томонидан сўралган қамоққа олиш ордерлари судья томонидан тасдиқланиши керак. Прокурор яқин вақт ичида ҳаракатнинг бошқа юқори мартабали аъзолари учун янги ордерлар сўрашини қўшимча қилди.
“Толибон” ҳаракати 2021 йилда АҚШ бошчилигидаги халқаро коалиция қўшинлари Афғонистондан олиб чиқиб кетилгандан сўнг мамлакатда ҳокимият тепасига келди. Шундан сўнг мамлакатдаги хотин-қизларга нисбатан кўплаб чекловлар жорий этилди. Тақиқлар туфайли аёллар ва қизлар таълим олиш, ишлаш, спорт, саёҳат қилиш ва дам олиш ҳуқуқидан маҳрум қилинди.
“Бу бизнинг овозларимиз унутилмаганига, дунё ҳамон тенглик ва адолат учун чақириқларимизни эшитаётганига умид бағишлайди”, дейди Афғонистонда қизлар учун уйма-уй саводхонлик дарслари ўтказаётган афғон аёл CNN’га.
У жазо чораларидан хавфсираб, ўз исмини ошкор қилмасликни сўради.
Афғонистонда аёлларга нисбатан жорий қилинган айрим тақиқлар қуйидагилар:
- афғонистонлик аёлларнинг БМТ идораларида ишлаши;
- эркакларга аёллар учун кийим тикиш;
- аёлларнинг эркак шифокорларга бориши;
- аёлларнинг шифохонага ёлғиз бориши;
- аёлларнинг истироҳат боғига ташриф буюриши,
- оилалар ва аёлларнинг боғлари ёки яшил ҳудудлари бўлган ресторанларга кириши,
- аёллар овози эшитилган рекламаларни эфирга узатиш,
- аёлларнинг сотувчилари билан савдолашиш,
- акушер ва ҳамшираликка ўқиш,
- аёл дикторларга телевизордаги янгиликларни ўқишни ва аёл журналистларга матбуот анжуманларига бориш,
- аёлларга бир-бири билан гаплашиш тақиқланган.
Изоҳ (0)