Ukraina mudofaa vaziri Rustem Umerov “Ramshteyn” formatidagi Aloqa guruhining 25-yig‘ilishida taqdim etilgan Ukrainaning 2025-yilga mo‘ljallangan harbiy strategiyasi haqida ma’lumot berdi.
“Uchrashuv davomida biz to‘rtta asosiy ustuvorlikka asoslangan strategiyamizni taqdim etdik: front chizig‘ini barqarorlashtirish, Ukrainaning mudofaa qobiliyatini mustahkamlash, havo va dengiz yo‘llarini himoya qilishni kuchaytirish, bosqinchining keng ko‘lamli ustunlikka erishish urinishlariga mutanosib javob berish”, deb yozadi Umerov Facebook’dagi sahifasida.
U “imkoniyatlar koalitsiyasi: aviatsiya, havo hujumidan mudofaa, dengiz imkoniyatlari, artilleriya, zirhli texnika, IT, dronlar va minalardan tozalash texnologiyalari” doirasida ishlab chiqilgan Ukraina mudofaa kuchlarini 2027-yilgacha rivojlantirish bo‘yicha “yo‘l xaritasi” tasdiqlanganini aytdi.
“Biz hamkorlikning yangi bosqichiga qadam qo‘ydik: urushning dolzarb ehtiyojlarini qondirishdan tashqari, armiyamizning uzoq muddatli salohiyatini shakllantirish ustida ham ish olib boramiz”, deya xulosa qildi Umerov.
Siyosatchi Germaniyada bo‘lib o‘tgan uchrashuvni “Ukrainaning mudofaa qobiliyatini mustahkamlashda navbatdagi bosqich bo‘lgan eng muhim uchrashuvlardan biri” deb baholadi.
Rossiya-Ukraina urushi boshlanganidan buyon o‘tgan qariyb uch yil ichida “Ramshteyn” formatiga a’zo davlatlar tomonidan Ukrainaga xavfsizlik sohasida 145 milliard dollardan ortiq yordam ajratilgan.
Ukraina ittifoqchilarining “Ramshteyn” formatidagi 25-uchrashuvi 9-yanvar kuni Germaniyaning Reynland-Pfalts shahrida joylashgan AQSH havo kuchlari harbiy bazasida bo‘lib o‘tdi. Bu safar uchrashuv ikki haftadan kamroq vaqt ichida sodir bo‘ladigan AQSH ma’muriyati o‘zgarishi arafasida o‘tkazildi.
AQSHning saylangan prezidenti Donald Tramp Ukrainaga harbiy yordam ko‘rsatishni bir necha bor tanqid qilib, qisqa vaqt ichida Rossiya-Ukraina urushini tugatishi mumkinligini ta’kidlagan edi. AFP agentligining xabar berishicha, bu Kiyev va uning ittifoqchilarida Tramp Ukrainani Moskvaga jiddiy yon berishga majburlashi mumkinligidan xavotir uyg‘otmoqda.
AQSH mudofaa vaziri Lloyd Ostin avvalroq Kiyevga qo‘shimcha 500 million dollarlik harbiy yordam paketini e’lon qildi va Ukrainani bundan keyin ham qo‘llab-quvvatlashga va’da berdi. Politico’ga ko‘ra, Ostinning AQSH mudofaa vaziri lavozimidan ketishi “Ramshteyn” formati doirasidagi Ukraina ittifoqchilari koalitsiyasining tarqalib ketishiga olib kelishi mumkin, bu esa o‘z navbatida Kiyev uchun “zarba” bo‘ladi.
Izoh (0)