AQSH prezidenti Jo Bayden ma’muriyati yaqinda Ukrainaga yana 500 million dollar miqdorida harbiy yordam paketi yetkazilishini e’lon qiladi.
Bu haqda Associated Press ikki manbaga tayangan holda xabar berdi.
Ma’lumotlarga ko‘ra, yordam PDA (Presidential Drawdown Authority) mexanizmi orqali ajratiladi, bu esa Amerika prezidentiga favqulodda vaziyat yuzaga kelgan taqdirda Kongress ruxsatisiz, farmon bilan xorijiy hamkoriga qurol yetkazib berish imkonini beradi. Pentagonning yuqori martabali mulozimining aytishicha, maqsad qurollarni yanvar oyi oxirigacha Ukrainaga topshirish.
AQSH 9-yanvar kuni Ukrainaga keng ko‘lamli yakuniy harbiy yordam paketini e’lon qilishi rejalashtirilgan. Bu bayonot AQSH mudofaa vaziri Lloyd Ostinning Germaniyaga tashrifi chog‘ida aytilishi kutilmoqda, u Ramshteyn aviabazasida Ukrainani qo‘llab-quvvatlovchi 50 ga yaqin hamkor davlat vakillari bilan uchrashadi.
Avvalroq Ukraina tashqi ishlar vaziri Andrey Sibiga Yevropa davlatlari va AQSHni mamlakatni faolroq qo‘llab-quvvatlashga chaqirib, hozirda bu boradagi sustkashlik yomon oqibatlarga olib kelishi mumkinligidan ogohlantirgandi.
“Hozir Ukrainaning sheriklari uchun charchoq yoki dam olish vaqti emas”, degan vazir. Sibiga tinchlikka erishish uchun Ukrainani ko‘proq qo‘llab-quvvatlash zarurligini ta’kidlagan.
Izoh (0)