Gruziya bosh vaziri Irakliy Kobaxidze Fransiya prezidenti Emmanuel Makronga Ukrainani kuzatishni maslahat berdi.
Makron 6-yanvar kuni Rossiyaning o‘z qo‘shnilariga nisbatan “ancha tajovuzkor” bo‘lib qolganini ta’kidlab, bunga misol sifatida Gruziyada 2024-yil 26-oktyabrda o‘tkazilgan parlament saylovlarini keltirgan. Fransiya rahbarining aytishicha, Rossiya Gruziyadagi saylov jarayonini beqarorlashtirmoqchi bo‘lgan.
“Fransiya prezidenti qurbon qilingan Ukrainaga e’tibor qaratsin. Men haqiqiy muammo haqida gapiryapman. Yolg‘onga izoh bera olmayman. Men bugun hamma guvohi bo‘lib turgan — vayron etilgan Ukraina muammosini sharhlamoqdaman”, dedi Kobaxidze.
Gruziyada parlament saylovlari 2024-yilning 26-oktyabr kuni o‘tkazilgan edi. Markaziy saylov komissiyasining yakuniy ma’lumotlariga ko‘ra, hukmron “Gruzin orzusi — Demokratik Gruziya” partiyasi 53,93 foiz ovoz bilan g‘alaba qozongan va qonun chiqaruvchi organdagi 150 o‘rindan 89 tasini egallagan. 5 foizlik chegarani to‘rtta muxolif partiya ham yengib o‘tgan.
Ular Gruziyaning sobiq prezidenti Salome Zurabishvili bilan birgalikda, saylov natijalarini soxtalashtirilgan deb hisoblab, tan olishdan bosh tortishgan. Muxolifat yetakchilari 4-noyabrdan boshlab norozilik namoyishlari o‘tkazib kelmoqda.
Izoh (0)