Amerika ma’muriyati 17-oktyabr kuni Ukrainaga navbatdagi harbiy yordam paketini e’lon qiladi. AQSH prezidenti Jo Bayden ukrainalik hamkasbi Vladimir Zelenskiy bilan telefon orqali muloqot qilishi rejalashtirilgan. Bu haqda Oq uy matbuot kotibi Karin Jan-Pyer jurnalistlar uchun navbatdagi brifingda ma’lum qildi.
“Prezident Bayden yaqin orada Vladimir Zelenskiy bilan telefon orqali gaplashadi va Ukrainaga xavfsizlik sohasida muhim yangi yordam paketini eʼlon qiladi”, dedi u.
Jan-Pyerning qo‘shimcha qilishicha, noyabr oyida Germaniyaning Ramshteyn aviabazasida Kiyevga qurol yetkazib berishni muvofiqlashtirish bo‘yicha davlat va hukumat rahbarlari darajasidagi aloqa guruhining yig‘ilishi bo‘lib o‘tadi.
Matbuot kotibining aytishicha, Bayden Germaniyaga bo‘lajak safarida Zelenskiy bilan uchrashmaydi. “Bayden Yevropada bo‘lganida ular uchrashish imkoniga ega bo‘lmaydi. Shu sababli Bayden Zelenskiy bilan oldindan telefon orqali muloqot qilishga qaror qildi”, dedi u.
Jan-Pyer, shuningdek, AQSH prezidenti Germaniyaga tashrifi chog‘ida boshqa xorijiy yetakchilar bilan uchrashishi kutilayotganini eslatib o‘tgan.
8-oktyabr kuni Bayden AQSHga yaqinlashib kelayotgan “Milton” to‘foni sababli Germaniyaga safarini keyinga qoldirishga qaror qilgandi.
Izoh (0)