AQSHning saylangan prezidenti Donald Trampning jamoasi Ukrainadagi mojaroni hal qilish bo‘yicha o‘z yondashuvini qayta ko‘rib chiqmoqda. Bu haqda mazkur masalani Tramp ma’muriyati bilan muhokama qilgan Yevropa rasmiylariga tayanib Financial Times xabar berdi.
Trampning mojaroni tezda hal qilish haqidagi saylovoldi bayonotlariga qaramay, hozirda uning jamoasi vaziyatni yarim yil ichida hal qilish mumkinligini aytmoqda. Bu yevropalik hamkorlar tomonidan Tramp ma’muriyatining Kiyevni qo‘llab-quvvatlashdan zudlik bilan voz kechish niyati yo‘qligining belgisi sifatida qabul qilinmoqda.
Tramp jamoasi Amerika qo‘shinlarining Jo Bayden davrida Afg‘onistondan chiqarilishini halokat sifatida qabul qilingan voqea bilan taqqoslashdan xavotirlanmoqda. Shu sababli ular Ukrainada bunday ssenariydan qochishga harakat qiladi, deb yozadi nashr.
FT ma’lumotlariga ko‘ra, Rossiya Ukrainaning NATOga qo‘shilmasligini kafolatlaydigan yangi xavfsizlik kelishuvlarini tuzishdan manfaatdor. Biroq Trampning Ukraina bo‘yicha maxsus vakili Kit Kelloggning aytishicha, bo‘lajak prezident mojaroni hal qilish doirasida Rossiyaga yon berish niyatida emas.
Rossiya prezidenti Vladimir Putin ma’lum shartlarga rioya qilgan holda muloqotga tayyorligini bir necha bor aytgan. O‘z navbatida, Ukraina prezidenti Vladimir Zelenskiy muzokaralarda Ukrainaning talablarini, jumladan, “NATOga qisman a’zolik” va qurol-yarog‘ yetkazib berishni davom ettirish kabilarni sanab o‘tgan.
“TASS” nashri avvalroq Tramp jamoasi Rossiya bilan xavfsizlik sohasida bitim tuzishni istisno etmagani haqida yozgan edi. Xavfsizlik bo‘yicha kelishuvlar Ukraina va NATOga taalluqli bo‘lishi hamda Moskva va Vashington o‘rtasida qizil chiziqlarni belgilashi mumkin.
Agentlik suhbatdoshi AQSHning Rossiyadagi elchisi kim bo‘lishiga aniqlik kiritmagan. Shu bilan birga, u Trampning maxsus vakili Kit Kellogning Kiyevga safari keyinga qoldirilganini tasdiqlagan.
Izoh (0)