Vengriya tashqi ishlar vaziri Peter Siyarto Ukraina Yevropa ittifoqi iqtisodiyotini qiyin ahvolga solib qo‘yganini aytdi.
Uning maʼlumotlariga ko‘ra, Kiyev Rossiya gazini tranzit qilishdan bosh tortayotgani maʼlum bo‘lgan dekabr o‘rtalaridan beri gaz narxi 20 foizga oshgan.
“Ukraina Yevropa ittifoqiga nomzod sifatida a’zo bo‘lishga intilayotgan bo‘lsa-da, o‘zining so‘nggi qarori bilan Yevropa iqtisodiyotini yana og‘ir ahvolga solib qo‘ydi”, deb yozdi Siyarto Facebook’dagi sahifasida.
Vazirning aytishicha, Ukraina orqali gaz tranzitining to‘xtatilishi Vengriyaga jiddiy zarar yetkazmagan. Ammo, uning fikricha, Kiyevning qarori narxlarning yanada ko‘tarilishiga olib keladi va Yevropa ittifoqining raqobatbardoshligiga zarba beradi.
2025-yil boshida Yevropa auksionlarida gaz narxi 2023-yil oktyabr oyidan beri eng yuqori darajaga ko‘tarildi — 1000 kub metr gaz narxi 540 AQSH dollarini tashkil qildi.
1-yanvar kuni “Gazprom” Ukraina orqali gaz yetkazib berishni butunlay to‘xtatdi, chunki “Ukraina Naftogaz”i bilan besh yillik tranzit shartnomasi tugadi. Rossiya konsernining ta’kidlashicha, Kiyev shartnomani uzaytirishdan bosh tortgan, shu sababli “Gazprom” gazni yetkazib berish uchun “texnik va yuridik imkoniyatlardan mahrum”.
Izoh (0)