Germaniya tashqi ishlar vaziri Annalena Berbokning ta’kidlashicha, Germaniya Polsha yoki boshqa mamlakatning Leopard 2 nemis tanklarini Ukrainaga yuborishiga qarshilik qilmaydi.
“Hozircha bunday so‘rov kelib tushgani yo‘q, ammo agar so‘ralsa, biz to‘sqinlik qilmaymiz”, — dedi Berbok jurnalistlarning agar Polsha Leopard’larni Ukrainaga yuborishni istasa, nima bo‘lishi haqidagi savoliga javoban.
Der Spiegel nashrining yozishicha, o‘tgan hafta, 18-yanvar kuni Germaniya tashqi ishlar vazirligi rahbari Bundestagdagi yig‘ilishda ham Berlin nemis tanklarini Kiyevga o‘tkazishga qaror qilgan uchinchi davlatlarning so‘rovini ma’qullashini aytgandi.
Germaniya qonunchiligiga ko‘ra, Germaniyada ishlab chiqarilgan qurollarga ega davlatlar uchun bu qurollarni Germaniya hukumatining roziligisiz urush zonasiga yuborish taqiqlangan.
Ukraina hukumati anchadan beri G‘arb ittifoqchilaridan Kiyevga tanklar, jumladan, Germaniyaning Leopard 2 tanklarini berishni so‘rab kelmoqda. NATOning bir qancha davlatlari, jumladan, Polsha ham o‘zidagi tanklarni topshirishga tayyorligini bildirgan, biroq buning uchun Germaniyadan ruxsat olish kerak. Ukraina ittifoqchilari 20-yanvar kuni Ramshteyn bazasida bo‘lib o‘tgan yig‘ilishda tanklar yetkazib berish masalasini muhokama qildi, ammo yakuniy qaror qabul qilinmadi. Shundan so‘ng Polsha, agar Germaniya Kiyevga Leopard 2 tanklarini berishga rozi bo‘lmasa, Ukrainani qo‘llab-quvvatlash uchun boshqa Yevropa davlatlari bilan “kichikroq koalitsiya” tuzishga tayyorligini ma’lum qildi.
Izoh (0)