Belarus prezidenti Aleksandr Lukashenko mamlakatdagi diktatura “Ukrainadagi demokratiyadan ko‘ra afzalroq” ekanini aytdi. Bu haqda u Logoysk shahrida Rojdestvo ibodati chog‘ida ma’lum qildi.
Lukashenkoning bayonoti u Ukraina prezidenti Vladimir Zelenskiydan uzr so‘ragani haqidagi xabarlar fonida yangradi. Zelenskiy avvalroq Lukashenko urushning ilk kunlarida uzr so‘raganini eslatgandi. Bunga Rossiya armiyasi Belarus hududidan raketa uchirgani sabab bo‘lgan.
“Urushning birinchi kunlaridan bir necha kun o‘tib, Lukashenko bilan telefonda gaplashdim va u kechirim so‘radi. Bu men emas, mening hududimdan raketalar uchirildi va Putin uchirdi. Sen ishon, Volodya, bu men emas. Men nazorat qilmayman, bu shunchaki raketalar, bu Putin...”, deya Zelenskiy Lukashenkoning gaplarini yodga olgan.
Ukraina yetakchisiga ko‘ra, Lukashenko Gomel viloyatidagi eng yirik Mozir neftni qayta ishlash zavodiga javob zarbasi berishni taklif qilgan.
Belarus Lukashenkoning uzr so‘raganini rad etmoqda
Lukashenko matbuot kotibi Natalya Eysmont Ukraina prezidentidan kechirim so‘ralmaganini aytdi.
“Oddiy sababga ko‘ra, biz kechirim so‘rashimiz shart emas. Avvalambor, Ukraina Belarusga qarshi sanksiyalarni birinchi bo‘lib joriy etgani, hatto Amerika va butun G‘arbdan oldinda yugurib ketgani yodimizda”, degan u.
Eysmontning so‘zlariga ko‘ra, Zelenskiy va Lukashenko o‘rtasidagi suhbat haqiqatan ham bo‘lib o‘tgan Belarus rahbari “birinchi navbatda mojaro Ukraina hududida, Zelenskiy hududida sodir bo‘lganini va vaqt o‘tishi bilan odamlar o‘limi uchun boshqalardan ko‘ra ko‘proq javob berishini aytgan”, dedi u.
Shundan so‘ng Kiyev va Moskva muzokaralarining 3-raundi Belarusda bo‘lib o‘tgan, so‘ngra muzokaralar Istanbulda davom etgani ta’kidlandi.
Izoh (0)