Ijtimoiy tarmoqlarda Namangan tumanidagi maktab va davlat bog‘chasi xodimlariga bayram konsertiga majburiy ravishda chipta sotilayotgani haqida xabarlar tarqaldi. Holat yuzasidan Namangan viloyati maktabgacha va maktab taʼlimi boshqarmasi axborot xizmati izoh berdi.
Maʼlum qilinishicha, tuman MMTB xodimi tomonidan o‘zboshimchalik bilan chiptalar sotilgani aniqlandi. Taʼlim muassasalari xodimlariga pullari qaytarib berildi.
MMTB xodimiga “hayfsan” intizomiy jazo chorasi qo‘llanildi.
“Viloyat maktabgacha va maktab taʼlimi boshqarmasi umumtaʼlim muassasalarida nainki majburiy, balki asossiz va qonunga zid ravishda har qanday pul mablag‘lari yig‘ilishiga yo‘l qo‘ymasligini bildiriladi”, deyiladi xabarda.
2023-yilning iyun oyida Namangan viloyatining Yangiqo‘rg‘on tumanidagi bog‘chalarda tarbiyachilarga konsertga majburiy tarzda bilet sotilayotgani haqida xabar berilgandi.
2024-yilning mayida Farg‘ona viloyatining Marg‘ilon shahrida bo‘lib o‘tishi rejalashtirilgan gala-konsert chiptalari o‘qituvchilarga majburiy tarzda sotilayotgani aytilgandi.
Izoh (0)