Namangan viloyatining Yangiqo‘rg‘on tumanidagi bog‘chalarda tarbiyachilarga konsertga majburiy tarzda bilet sotilayotgani xabar berildi. Bu haqda “Daryo”ga maʼlum qilgan manbaning aytishicha, bilet narxi 80 ming so‘m.
“Mening qizimga ishxonasidan majburiy tarzda bilet berishibdi. O‘zi arzimagan oylikka ishlashsa, hali oylik olishmasa-da, bilet sotib olasizlar deb majburlashayotgan ekan. Ishonsangiz, go‘sht sotib olib yeyishga, pulimiz yetmayapti. Shu ish adolatdanmi?”, — deydi bilet olishga majburlanayotgan ishchining onasi.
“Daryo” mazkur holat yuzasidan Namangan viloyati Maktabgacha va maktab taʼlimi boshqarmasi axborot xizmati vakili Saidolim Abdurahmonov bilan suhbatlashdi.
“Bu haqida xabarim yo‘q ekan. Konsert bo‘lishini ham sizdan eshityapman. Holat haqida surishtirib, maʼlumot beramiz”, — deydi jurnalistning bu haqidagi savollariga javob bergan Saidolim Abdurahmonov.
Yangiqo‘rg‘on tumani hokimligi axborot xizmati rahbari Kamola Jo‘raboyevaning maʼlumot berishicha, haqiqatan ham tuman Maktabgacha va maktab taʼlimi bo‘limiga Avaz Oxunning 2023-yil 16-iyun kuni bo‘lib o‘tishi rejalashtirilgan konsertiga 100 ta bilet berilgan.
“Ammo 100 ta bilet konsertga tushishni istovchilar uchun berilgan. Majburiy sotilayotgani haqidagi gap yolg‘on. Bo‘lim mudiri o‘rinbosarining aytishicha, 100 ta biletdan atigi 4 tasi sotilgan. Shu to‘rtta biletning puli ham qaytarib beriladi. Bog‘chalarga bilet sotilmaydi”, — deydi hokimlik axborot xizmati rahbari Kamola Jo‘raboyeva.
“Daryo” muxbiri biletda nomeri ko‘rsatilgan masʼullar bilan ham bog‘landi.
O‘zini Husniddin Umarov deb tanishtirgan bilet sotuvchisining aytishicha, biletlar “O‘zbekkonsert”ning Namangan viloyati bo‘limi tomonidan shartnomaga ko‘ra, bog‘chalarga berilgan bo‘lishi mumkin.
“‘O‘zbekkonsert’ning viloyat bo‘limi bog‘chalardagi tadbirlarni tashkil qilishda bog‘chalarga yordam bergani uchun ‘O‘zbekkonsert’ning viloyat bo‘limi bilan shartnoma qiladi. Bu biletlar shu shartnomaga ko‘ra, bog‘chalarga berilgan bo‘lishi mumkin”, — deydi “O‘zbekkonsert”ning viloyat bo‘limida ishlashini aytgan Husniddin Umarov.
“O‘zbekkonsert”ning viloyat bo‘limi masʼuli Murodjon Qudratov esa Husniddin Umarovning gapini rad etib, bilet sotish masalasiga “O‘zbekkonsert” viloyat bo‘limining aloqasi yo‘qligini bildirdi.
“Biz konsert tashkilotchilariga ijaraga konsert zal berdik. Biz bilet sotmaymiz. To‘g‘ri, biletlar majburiy sotilmasligini nazorat qilamiz. Avaz Oxunning konsertiga biletlar majburiy sotilayotganidan xabarimiz yo‘q ekan”, — deydi Murodjon Qudratov.
Murodjon Qudratovning qo‘shimcha qilishicha, Avaz Oxunning viloyatda bo‘lib o‘tishi rejalashtirilayotgan konsertini tadbirkor tashkil qilayotgan bo‘lib, biletlarning majburiy sotilishi tadbirkorga borib taqalishi mumkin.
Konsert tashkilotchisi bo‘lgan tadbirkor Bahodir O‘rinboyevning “Daryo”ga maʼlumot berishicha, u Maktabgacha va maktab taʼlimi bo‘limi masʼuliga u 100 ta emas, 200 ta bilet bergan.
“Yordam beramiz deyishganiga bo‘lim rahbariga 200 ta bilet bergandik. Ammo biletlar majburiy sotilayotganidan xabarimiz yo‘q ekan. Biz biletlarning majburiy sotilishiga qarshimiz. Agar biletlarni majburiy sotishga harakat qilganimizda Telegram kanallarida konsert haqida eʼlon bermas edik. Bitta bilet majburiy sotilsa ham, bizning qilayotgan mehnatlarimiz kuygan bo‘ladi. Holatga aniqlik kiritib, bo‘limga berilgan 200 ta biletimizni qaytarib olamiz”, — deydi tadbirkor.
Izoh (0)