O‘zbekistonda nodavlat maktabgacha va maktab tashkilotlari barcha turdagi soliq va yig‘imlardan ozod qilinadi. Bu haqda “Ta’lim sohasida xususiy sektor ishtirokini oshirish bo‘yicha qo‘shimcha chora-tadbirlar to‘g‘risida”gi prezident qarorida belgilandi.
Qaror bilan 2030-yil 1-yanvargacha nodavlat maktabgacha va umumiy o‘rta ta’lim tashkilotlari:
- barcha turdagi soliq (bundan ijtimoiy soliq mustasno) va yig‘imlardan ozod qilinadi;
- unda mehnat faoliyatini amalga oshirayotgan chet ellik o‘qituvchi va mutaxassislar jismoniy shaxslardan olinadigan daromad solig‘i va ijtimoiy soliq to‘lamaydi.
Shuningdek, 2030-yil 1-yanvarga nodavlat maktabgacha va umumiy o‘rta ta’lim tashkilotlarining O‘zbekistonda ishlab chiqarilmaydigan quyidagi tovar jihozlariga bojxona to‘lovlari to‘lanmaydi (bojxona rasmiylashtiruvi uchun yig‘imlar bundan mustasno):
- zamonaviy o‘quv va laboratoriya uskunalari;
- kompyuter texnikasi va dasturiy mahsulotlar;
- o‘quv va ilmiy-metodik adabiyotlar, anjomlar va moddiy-texnik resurslar.
2025-yil 1-yanvardan boshlab nodavlat ta’lim tashkilotlariga doimiy jalb etiladigan pedagog xorijiy mutaxassislarga “A-2” o‘qituvchilar kirish vizalarini berish yo‘lga qo‘yiladi.
Shuningdek, davlat va nodavlat ta’lim tashkilotlari tomonidan xorijdan jalb qilingan mutaxassislarga mehnat qilish huquqini beruvchi tasdiqnoma berish yig‘im miqdori BHMning 30 baravaridan 1 baravarigacha kamaytiriladi.
Hujjatda qayd etilishicha, bundan o‘zgarishlardan maqsad nodavlat ta’lim xizmatlarini ko‘rsatish faoliyatini qo‘llab-quvvatlash, ta’lim sohasida xususiy sektor ulushini yanada oshirish, ushbu yo‘nalishdagi tadbirkorlik subyektlariga qulay shart-sharoitlar yaratish hamda o‘qitishning innovatsion pedagogik shakllari, uslublari va texnologiyalarini joriy qilishdir.
Bundan avval O‘zbekistonda maktabgacha va maktab ta’limi vaziri jamg‘armasi hisobidan bog‘cha xodimlarini rag‘batlantirishga ruxsat etilishi haqida xabar berilgan edi. 2025-yil 1-yanvardan maktabgacha ta’lim tashkilotining direktori o‘rinbosari lavozimi joriy etiladi. Respublikaning barcha tuman (shahar)larida kamida bittadan tayanch maktabgacha ta’lim tashkilotlari faoliyati yo‘lga qo‘yiladi.
Oktyabrda imzolangan prezident farmoni bilan O‘zbekistonda xususiy bog‘chalar tashkil etish uchun ajratilgan imtiyozli kreditlarni qaytarish muddati 5 yilga uzaytirildi.
Izoh (0)