Muhammad Rasul 1996-yilning 20-mart kuni Farg‘ona viloyati Buvayda tumani Yangiqo‘rg‘on qishlog‘ida tug‘ilgan. 2011—2014-yillarda Jahon iqtisodiyoti va diplomatiya universiteti qoshidagi akademik litseyda taʼlim olgan. Keyinchalik, 2014—2018-yillarda O‘zbekiston davlat jahon tillari universitetining Xorijiy til va adabiyoti (ingliz tili) yo‘nalishida bakalavr darajasini qo‘lga kiritgan.
2019—2020-yillarda Latviya poytaxti Rigada joylashgan Ekonomikas un Kulturas Augstskola universitetida o‘qishni davom ettirib, 2020—2022-yillarda Praga Montessori institutida taʼlim olgan, bu esa kelgusidagi faoliyatiga katta zamin yaratganini ta’kidlaydi.
Muhammad Rasul 2017—2018-yillarda Toshkent viloyatining Yuqori Chirchiq tumanidagi 10-maktabda ingliz tili o‘qituvchisi sifatida ishlagan. 2018—2019-yillarda esa QDPI qoshidagi akademik litseyda ingliz tili o‘qituvchisi lavozimida faoliyat yuritgan. 2019-yilda Rigele Xalqaro Montessori bolalar markaziga qo‘shilgan. Dastlab ingliz tili o‘qituvchisi sifatida ish boshlab, 2020-yilda 3–6-sinf assisstenti bo‘lgan va nihoyat, 2021-yildan 2024-yil aprelgacha 3–6-sinflarning yetakchi gid o‘qituvchisi lavozimida ishlagan.
2024-yil may oyida O‘zbekistonga qaytib Dildora Kalonxo‘jayeva bilan birgalikda Toshkent xalqaro Montessori maktabiga asos solgan. Shu bilan birga, 2024-yil sentyabr oyida “Bambini” platformasini ishga tushirgan.
Aslida Latviyaga magistratura bosqichida Biznes administratsiyasini o‘qishga borgan edim. Ish izlab yurgan vaqtlarim, 2019-yilda Rigele Xalqaro Montessori bolalar markaziga qo‘shildim. Dastlab ingliz tili o‘qituvchisi sifatida ish boshlab, 2020-yilda 3–6-sinf assisstenti bo‘ldim. Men ushbu ta’lim turi ta’lim tizimimizni rivojlantirish uchun kalit ekanligini tushunib yetdim. Shu sababli ham magistraturamni tashlab Praga Montessori institutiga o‘qishga kirdim.
Men har doim vatanga qaytishimni bilardim. Yo‘lga otlanishimdan avval buvam “O‘g‘lim, chetga ketayotgan bo‘lsang, u yerda bilim olib, o‘qib, O‘zbekistonga yangilik olib kel. Hatto velosipedning yangi bir qismini o‘rgansang ham, shuni olib kel”, deganlar. Bu har doim quloqlarim ostida turgan. Va nihoyat 2024-yilda vatanga qaytishim oldidan Latviya, Estoniya, Slovakiya, Chexiya, Belgiya va Dubaydagi maktablardan takliflar kela boshladi. Ammo men O‘zbekistonga yevropaliklar yoki dunyoning boshqa rivojlangan mamlakatlarida mavjud ta’lim turini keng yoyish, bolalarga o‘zim sifatli deb bilgan bilimlarni berish maqsadida qaytdim.
Montessori haqida
Montessori tizimi bilan tasodifan tanishib qolganman. Ustozlarning bolalarga mehri, hurmati, munosabati, muloqoti, ularni tushunishi mening hayotiy missiyam aynan shunda, degan fikrga kelishimga turtki bo‘ldi. Hayotning qiziqligi shundaki, men har doim yaqinlarimga o‘qituvchi sifatida ishlamasligim haqida gapirardim. Bu kasb egalarining fidoyiligi, o‘rni kelsa, hatto oilasidan ham ko‘proq mehrni aynan bolalarga berishi kerakligi ozroq qo‘rquv solardi.
Montessori tizimi bolaga hurmat, ruhiy va jismoniy bola uchun tayyorlangan muhit, chegaralar ichida erkinliklar, intellektual, ruhiy va jismoniy tayyorgarlikdan o‘tgan namuna bo‘la oladigan Montessori o‘qituvchisi va ota-onasi, bolaning zaruratlarini ta’minlash kabi tamoyillarga asoslanadi. Har bir bola uchun individual dastur ishlab chiqiladi, bolalar miya rivojlanish bosqichlariga asoslangan guruhlar, masalan, 1,5 yoshdan 3 yoshgacha sinf, 3 yoshdan 6 yoshgacha sinf, 6 yoshdan 12 yoshgacha sinf 12 yoshdan 18 yoshgacha sinflar tashkil etiladi. Bola o‘zi doimiy tanlov qiladi, mustaqillikka qadam qo‘yadi. Mas’uliyatli bo‘ladi, bu esa unga ishonch beradi. Bu o‘z navbatida bolaga quvonch va doimiy yangi materiallarni o‘zlashtirishga imkon yaratadi. Montessori metodi yaxlit bo‘lib, u orqali bolaning jismoniy, aqliy, ruhiy va ijtimoiy rivojlanishini qo‘llab-quvvatlash mumkin. Shuning uchun boshqa qo‘shimcha metodlarga ehtiyoj yo‘q. Materiallarimizning hammasi Montessori materiallari.
Bolalarning yangi materialni ko‘rsatganimda kashfiyot hissini tuyushi, ularning ko‘zidagi qiziqish, hayratni ko‘rishdan-da zavqliroq jarayon yo‘q. Yaqinda bir bolakayga yangi materialni ko‘rsatdim, u shu darajada qiziqdiki, kuni bilan 3 soat hech qayerga chalg‘imasdan ishladi. Bu ishimning birinchi yili edi. Men buni ko‘rib to‘g‘ri yo‘ldaligimni tushunganman. Bolalar bilan ishlashda eng muhimi rahmdil, mehribon bo‘lish va doim o‘z ustida ishlashga tayyorlik.
Hozirda Toshkent xalqaro Montessori maktabida asosiy strategik qarorlarni qabul qilaman, yetakchi gid sifatida sinfda bolalar bilan ishlayman. Bundan tashqari, ota-onalar bilan doimiy muloqot, tashkilotchilik vazifalari, bolalar qabuli va ularning moslashish jarayoni kabi mas’uliyatlar mening bo‘ynimda. Aytish kerakki, ota-onalarning aksariyati O‘zbekistonda Montessori tizimi haqida tasavvurga ega emas va bu tabiiy hol. Maqsadim har bir o‘zbek ota-onasi Montessori haqida eshitishi, ularga tizim falsafasini yetkazish, uyda farzandiga inson sifatida muomala qilishi va hurmat bilan munosabatda bo‘lishiga erishishdan iborat. Mehr va muhabbatga asoslangan muhitni yaratish, xavfsiz va sog‘lom munosabatlarni shakllantirish, bolalarni urmasdan, ularga baqirmasdan, ularni boshqalarga solishtirmasdan, ularni kamsitmay emotsional holatiga e’tibor berib tarbiyalash orqali yordam berish mumkin.
2024-yil dekabr oyida qahramonimiz Qozog‘iston, Qirg‘iziston va Tojikistondagi Montessori maktablari bilan hamkorlik memorandumini imzolab, Olmaota shahrida Markaziy Osiyo Montessori institutiga asos solishda ishtirok etgan.
Izoh (0)