Hind kino olami haqida ko‘pchilikning tasavvurida ajoyib sevgi qissasi, quvnoq raqslar va ishonarli chiqmaydigan o‘lim sahnalaridan iborat, degan tushuncha mavjud. Ammo Zita va Gita haqidagi film suratga olingan davrdan beri hind kino sanoatida katta burilish sodir bo‘lgan va bugungi kunda Bollivud filmlari Yevropa va AQSHning eng nufuzli loyihalari bilan bellasha oladigan darajaga yetgan. Quyidagi ajoyib syujetga ega yettita loyiha hind kinolari to‘g‘risidagi tasavvurlaringizni o‘zgartirib yuborishi ajab emas.
“RRR: Inqilob yaqinlashmoqda” (2022)
Janr: blokbaster, tarix, drama
Filmda 1920-yillardagi mustamlaka hukumat haqida hikoya qilinadi. Davlat xizmatidagi Bxim ismli sodiq politsiyachi olomon bilan yakkama-yakka kurasha oladigan kuchli inson. Ammo mahalliy aholi uni xoin deb hisoblaydi.
Gond qabilasidan bo‘lgan yigit o‘g‘irlab ketilgan yosh ayolni qidirish uchun Dehliga borishga qaror qiladi. Bu haqda bilib qolgan gubernator uni qo‘lga olish uchun katta mukofot e’lon qiladi. Martabasini oshirishni maqsad qilgan Rama bu vazifani o‘z zimmasiga oladi. Ammo hech kim Bxim ko‘rinishi qanday ekanligini bilmaydi. Kunlarning birida Rama daryoga g‘arq bo‘lishiga oz qoladi va uni Bxim qutqarib qoladi. Ular bir-birining aslida kim ekanligini bilishmaydi, ammo ushbu tanishuv ikkisining taqdiri o‘zgarib ketishiga sabab bo‘ladi.
“Mening ismim Xon” (2010)
Janr: drama, melodrama, sarguzasht
Asperger sindromidan aziyat chekadigan hindistonlik musulmon yigit Rizvon Xon oila qurib, ishlash maqsadida Mumbaydan San Fransiskoga jo‘nab ketadi. O‘zining jiddiy tashxisi tufayli jamiyatga qo‘shilishga va ish topishga qiynalgan Rizvon oxir-oqibat munosib ish topadi. Kasallik unga sevgisini topishga ham to‘siq bo‘la olmaydi va Mandira ismli qizning qo‘lini so‘rashga muvaffaq bo‘ladi. 2001-yilda sodir bo‘lgan teraktdan so‘ng Amerikada musulmonlarga bo‘lgan munosabat keskin o‘zgaradi. Buni ko‘tara olmagan Mandira Rizvondan ketadi. Uni ortga qaytarish hamda musulmonlarga bo‘lgan munosabatni o‘zgartirish uchun Rizvon butun Amerika bo‘ylab sayohatga yo‘l oladi.
“Pikey” (2014)
Janr: Fantastika, drama, komediya
Pikey maxsus topshiriq bilan Yerga kelgan o‘zga sayyoralik haqidagi filmdir. U inson tabiatini tushunishi va mahalliy hayot qanday bo‘lishini o‘rganishga harakat qiladi. U duch keladigan birinchi muammo — uning boshqaruv paneli o‘g‘irlanishi bo‘lib, panelsiz Pikey uyiga qaytolmaydi. Endi u nafaqat o‘ziga yuklangan vazifani bajarishga, balki qurilmani topishga ham majbur bo‘ladi.
Pikey o‘zining g‘ayritabiiy xatti-harakatlari bilan boshqalarni hayratda qoldiradi, noqulay savollari esa odamlarni hayotlariga va ular yashayotgan dunyoga boshqacha qarashga majbur qiladi.
Fantastik komediya Hindistondagi eng yuqori daromad keltirgan filmlardan biriga aylandi, uning dunyo bo‘ylab daromadi 112 million dollardan oshadi.
“Dangal” (2016)
Janr: biografiya, drama
“Dangal” dramasi kambag‘allik tufayli sportdan kechgan Maxavir Singx Pxogat haqidagi film bo‘lib, hayotiy voqealik asosida suratga olingan. Unda bosh qahramon oilasini boqish uchun noilojlikdan sportni tashlashiga to‘g‘ri keladi va o‘ziga o‘zi o‘g‘il farzandli bo‘lsa u albatta, jahon chempioni bo‘ladi, deb va’da beradi. Ammo oilasida birin-ketin qiz farzandlar dunyoga keladi.
Uning uchinchi va to‘rtinchi farzandi ham qiz bo‘ladi va qizlar katta bo‘lganida onalar o‘g‘illarini, qizlar urganini aytib sobiq sportchi uyiga shikoyat qilib kela boshlaydi. Cho‘kayotgan odam xasga yopishadi, deganlaridek qahramon xayoliga ajoyib narsa keladi va qo‘ni-qo‘shnilarning gap so‘ziga qaramay bir vaqtlar qilgan oltin medal orzusi sabab qizlari bilan shug‘ullana boshlaydi va natija uzoq kuttirmaydi.
“Murabbiy” (2018)
Janr: drama, komediya
Naina Matur bolaligidan doim o‘qituvchi bo‘lishni istaydi, u Turret sindromiga ega bo‘lishiga qaramay istagan yo‘nalishida tahsil oladi. Ammo ishga kirgach, o‘quvchilar uni ochiqchasiga masxara qiladi, boshqa maktab direktorlari esa uni ishga olishni istamaydi. Hatto uning onasi ham Naina o‘qituvchi bo‘lib ishlab ketishiga ko‘zi yetmaydi. Shunga qaramay taqdir qizga bir imkoniyat beradi va u o‘zi orzu qilgan nufuzli maktabga ishga joylashadi. Bu yerda ham murabbiy avvalgi qiyinchiliklarga duch keladi, ammo bu safar o‘zining zaif tomonini katta kuchga aylantiradi. Filmda barcha narsaning ilojini topish mumkinligi hamda inson ba’zan o‘zining ustidan ham kulib turishi kerak ekanligi haqidadir.
“Sirli super yulduz” (2017)
Janr: musiqali film, drama
Gujaratlik 14 yoshli qiz qo‘shiqchi bo‘lishni orzu qiladi. Ammo uning otasi qizining musiqa tanlovida ishtirok etishiga qarshi turadi. Bosh qahramon o‘z maqsadidan voz kechmaydi va gitara chalgan holatda qo‘shiq aytib video suratga oladi. Videoda u niqob bilan yuzini yashiradi va internetga joylaydi. Rolik nihoyatda mashhur bo‘lib, tarqalib ketadi.
Mazkur film jahon prokatida katta muvaffaqiyatga erishgan va 2,3 mln dollar byudjet bilan 154 mln dollar daromadga chiqqan.
“Uch savdoyi” (2009)
Janr: komediya, melodrama
“Uch savdoyi” — o‘tish davri va ta’lim tizimiga bag‘ishlangan ajoyib satira. Muhandislik kollejining uch talabasi katta hayotda qanday natijalarga erishgani haqida hikoya qiladi. Aniqrog‘i ushbu kartinada hammasi ortga qarab sodir bo‘ladi. O‘tmishni to‘g‘ri tiklashdan oldin ikki do‘st uzoq vaqtdan buyon ko‘rinmay ketgan do‘stini topishga otlanadi.
2009-yilda namoyish qilingan mazkur film 2013-yilda “Tezlik-3” filmi namoyish etilguniga qadar barcha davrlardagi eng ko‘p daromad keltirgan hind filmi rekordini ushlab turdi. Shuningdek, u Xitoy va Yaponiya kabi Sharqiy Osiyo mamlakatlarida muvaffaqiyat qozongan hind filmlaridan biridir.
“Uch savdoyi” oltita Filmfare Awards, shu jumladan, uchta “Milliy film”, “Eng yaxshi mashhur film” kabi mukofotlarga sazovor bo‘lgan. Xorijda esa Yaponiyada bo‘lib o‘tgan Videoyasan Awards tanlovining bosh sovriniga ega bo‘lgan. Film remeyki hattoki Meksikada ham suratga olingan.
Izoh (1)
Ko'pi Amirxon ijodidagi kinolar ekan men uchun Amir Shohruxdan kuchliroq