Jizzax viloyatining Arnasoy tumanidagi maktabda 2-sinf o‘quvchisi sinf rahbari tomonidan qo‘liga ruchka sanchib jazolangani aytilmoqda. Bu haqda “Daryo”ga o‘quvchining xolasi xabar berdi.
Tumandagi 8-sonli umumiy o‘rta ta’lim maktabining 2-“A”sinf o‘quvchisi J.I. “y” harfini “q” tarzida yozgani uchun sinf rahbari tomonidan shu tarzda jazolangan.
Voqea 2024-yilning 18-noyabr kuni sodir bo‘lgan.
“Sinf rahbari Nasiba Qo‘nisheva shunday qilib bolaning qo‘lini teshib tashlabdi. Jiyanimning qo‘llari shishib og‘riyapti. Ota-onasi kimgadir shikoyat qilishga andisha qilmoqda. Jiyanim esa og‘riqqa chidolmay yig‘lab yotibdi”, deydi murojaatchi.
O‘quvchining xolasiga ko‘ra, jiyani shu voqeadan keyin boshqa maktabga o‘tkazilgan.
“Jiyanimni 22-sonli maktabga o‘tkazishdi. Lekin o‘qituvchiga chora ko‘rilmagan. Maktab rahbariyati bunga e’tibor qaratmayapti”, deydi u.
Murojaatchining qo‘shimcha qilishicha, ushbu maktabda o‘quvchilarni urib, boshini yorgan o‘qituvchilar ham bor. Ular bu qilmishi uchun sudda ham javob bergan.
Izoh (0)