Ижтимоий тармоқларда Наманган туманидаги мактаб ва давлат боғчаси ходимларига байрам концертига мажбурий равишда чипта сотилаётгани ҳақида хабарлар тарқалди. Ҳолат юзасидан Наманган вилояти мактабгача ва мактаб таълими бошқармаси ахборот хизмати изоҳ берди.
Маълум қилинишича, туман ММТБ ходими томонидан ўзбошимчалик билан чипталар сотилгани аниқланди. Таълим муассасалари ходимларига пуллари қайтариб берилди.
ММТБ ходимига “ҳайфсан” интизомий жазо чораси қўлланилди.
“Вилоят мактабгача ва мактаб таълими бошқармаси умумтаълим муассасаларида наинки мажбурий, балки асоссиз ва қонунга зид равишда ҳар қандай пул маблағлари йиғилишига йўл қўймаслигини билдирилади”, дейилади хабарда.
2023 йилнинг июнь ойида Наманган вилоятининг Янгиқўрғон туманидаги боғчаларда тарбиячиларга концертга мажбурий тарзда билет сотилаётгани ҳақида хабар берилганди.
2024 йилнинг майида Фарғона вилоятининг Марғилон шаҳрида бўлиб ўтиши режалаштирилган гала-концерт чипталари ўқитувчиларга мажбурий тарзда сотилаётгани айтилганди.
Изоҳ (0)