Afra Saracho‘g‘lu 27 yoshda: otasi tashlab ketgan, universitetni bitirolmagan va onasi tufayli mashhur bo‘lgan sevimli aktrisangiz haqida qiziqarli faktlar

Afra Saracho‘g‘lu — turdizining istiqbolli yulduzlaridan biri, hozirda uning nomi butun dunyoga mashhur. Bu turk aktrisasi boy oilada tug‘ilmagan. Muvaffaqiyatga erishish uchun ko‘p ishlashiga to‘g‘ri kelgan.

Afra Sarachog‘lu 1997-yil 2-dekabrda Edremit shahrida tavallud topgan. Ota-onasi shou-biznes olamidan yiroq insonlar edi. Qizcha 9 yoshga to‘lganda ular ajrashib ketishadi. Shundan so‘ng Afra onasi bilan birga Antaliyaga ko‘chib o‘tadi. Lutfiye xonim qizini barcha zarur narsalar bilan ta’minlash uchun ko‘p mehnat qilishiga to‘g‘ri kelardi. 14 yoshida Afra Sarachog‘lu modellik sohasida muvaffaqiyatga erishishi mumkinligini tushunadi — yorqin tashqi ko‘rinishi va ajoyib qomati bilan podiumlarni zabt etadi.

U onasini menejeri qilib oladi. Lutfiye xonim qizi nomidan va uning qonuniy vakili sifatida modellik agentliklaridan biri bilan foydali besh yillik shartnoma imzolaydi. Juda band bo‘lishiga qaramay, Afra o‘qishni davom ettiradi va hatto Eskishehir Osmangazi universitetiga o‘qishga kiradi. Saracho‘g‘lu hayotining keyingi bosqichi kinematografiya bilan bog‘liq bo‘lishi lozimligini tushunadi.

Ijodiy faoliyati

Afra Saracho‘g‘lu 2015-yilda kinematografiyaga ilk qadamini qo‘yadi. Aynan o‘sha paytda unga “Eng go‘zali” filmida kichik rol berilgandi. Biroq film katta muvaffaqiyatga erishmaydi, buning ustiga aktrisaning roli ham ahamiyatsiz edi. Bir yil o‘tib, u “Ikkinchi imkoniyat” serialiga kasting orqali tanlab olinadi va bu unga turk seriallari olamiga yo‘l ochadi. E’tiborli jihati shundaki, aynan onasi tufayli Afra kastingga taklif etiladi. Lutfiye xonim ijtimoiy tarmoqlarda kasting haqidagi e’lonni ko‘rib qoladi. U nafaqat bosh erkak rolini ijro etgan, balki ushbu serialning rejissyori ham bo‘lgan O‘zjan Deniz bilan bog‘lanadi. Afraning onasi unga qizi va uning orzulari haqida so‘zlab beradi, shuningdek, qizining tarjimayi holini yuboradi. Natijada Saracho‘g‘lu tanlovdan o‘tadi va rol unga nasib qiladi.

2017-yilda yosh aktrisa “Yomon yigit” to‘liq metrajli filmida bosh rolni ijro etadi, bu filmda uning partnyori Tolg‘a Saritash bo‘ladi. Mazkur turk dramasi dunyoning ko‘plab mamlakatlarida tomoshabinlarning e’tiborini tortib, Afra haqida turk seriallarining yuksalayotgan yulduzi sifatida gapira boshlaydilar.

Shundan so‘ng aktrisa “Fazilat xonim va qizlari” serialiga taklif qilinadi. Aynan shu loyiha tufayli u haqida butun dunyo biladi. Saracho‘g‘lu o‘zining o‘sib borayotgan mahorati va serqirraligini yaqqol namoyish etadi.

2019-yilda Afra “Xolavachchalar” dramasida, bir yil o‘tgach, esa “O‘qituvchi” serialida rol o‘ynaydi, keyin esa “Yeshilcham”dan taklif oladi. 2022-yildan beri Saracho‘g‘lu “Qo‘rg‘on sirlari” serialida bosh ayol rolini o‘ynamoqda. Aynan u so‘nggi yillardagi turdizilarning eng rang-barang, yorqin, serqirra va go‘zal qahramoni Seyran Shanlini yaratdi.

Afra Saracho‘g‘lu, shubhasiz, juda iste’dodli va yorqin turk aktrisasi bo‘lib, uning karyerasi endigina muvaffaqiyatli rivojlana boshlagan. Uning har bir roli oldingisidan tubdan farq qiladi va har safar u qahramonlarining hayotini a’lo darajada ijro etadi.

Shaxsiy hayoti

Mashhur turk aktrisasi shaxsiy hayoti haqida gapirishni yoqtirmaydi. Ma’lum bo‘lishicha, u 2018-yildan beri Mert Yazijio‘g‘lu bilan munosabatda bo‘lgan. Juftlik 2022-yilda ajralishgan. Avvaliga Afra Mert Ramazon Demir bilan ishqiy munosabatda bo‘lgani haqida mish-mishlar tarqaldi. Yulduzlar buni har tomonlama rad etishgan bo‘lsa-da, bir necha oy o‘tgach, Yazijio‘g‘lu Afra bilan ajrashganini tasdiqladi.

2023-yildan beri turk aktrisasi “Qo‘rg‘on sirlari”dagi hamkasbi — Mert Ramazon Demir bilan uchrashmoqda. Mashhurlar munosabatlarini rasmiy ravishda tasdiqlamagan bo‘lsa-da, rad ham etmagan. Turkiyalik muxbirlar ularni bir necha bor birga suratga olishgan, kadr ortidagi videolarda esa yulduzlarning bir-biri bilan hazillashishini ko‘rish mumkin. Shunga qaramay, Afra va Mert munosabatlarni ochiqchasiga tan olishmaydi.

Afra Saracho‘g‘lu hozir

Hozirda Afra Saracho‘g‘lu “Qo‘rg‘on sirlari” serialida rol o‘ynashda davom etmoqda. U, shuningdek, bir nechta brendlarning rasmiy vakili bo‘lib, modellik faoliyatini davom ettirmoqda. Aktrisa bo‘sh vaqtini do‘stlari va onasi bilan o‘tkazadi. Yaqindagina u onasini Istanbulga ko‘chirib, villasi yonidagi uyni ijaraga olgandi.

Afra Saracho‘g‘lu haqida qiziqarli faktlar

• Afra otasi bilan gaplashmaydi. Ajrashgandan so‘ng aktrisaning otasi AQSHga ketgan va unga hech qanday yordam bermagan. 2024-yilning yozida Turkiya ommaviy axborot vositalarida Saracho‘g‘lu otasi bilan yarashish uchun Amerikaga ketgani haqida xabar tarqaladi. Keyinchalik aktrisa bu mish-mishlarni rad etdi.
• Aktrisa oliy ma’lumotga ega emas. Afra tig‘iz ish jadvali tufayli akademik ta’til olishga majbur bo‘lgan. Onasining so‘zlariga ko‘ra, u “Qo‘rg‘on sirlari”ning uchinchi mavsumi finalidan so‘ng universitetga qaytishni rejalashtirmoqda.
• Afra uy hayvonlarini juda yaxshi ko‘radi — uning suratga olish maydoniga olib boradigan iti va mushugi bor.
• Turkiyalik aktrisa yoshligidan kino haqida orzu qilgan. Uning aytishicha, bolaligida o‘zi ham ssenariy yozishga harakat qilgan va do‘stlari uchun teatrlashtirilgan tomoshalar uyushtirgan.
• Lutfiye nafaqat Afraning onasi va menejeri, balki uning eng yaqin do‘sti ham. Aktrisa bir necha bor muvaffaqiyatga faqat uning yordami va qo‘llab-quvvatlashi tufayli erishganini aytgan.
• Eddi Redmeyn — Saracho‘g‘luning kumiri. Aktrisa uni ideal aktyor deb hisoblaydi.
• Aktrisaning so‘zlariga ko‘ra, u juda sezgir va ta’sirchan bo‘lib, ba’zida o‘zini nazorat qilishi qiyin bo‘ladi. Biroq aynan shunday ta’sirchanlik unga qahramonlarini aniq his qilish imkonini beradi.