“Toshkent yoshlarni sevadi” oyligida o‘tkazilgan tanlovlar g‘oliblari va yil bo‘yi yoshlar bilan faol ishlaganlar taqdirlandi

Toshkent shahar hokimligi va Yoshlar ishlari agentligi Toshkent shahar boshqarmasi tashabbusi bilan 15-noyabrdan 15-dekabrgacha o‘tkazilgan “Toshkent yoshlarni sevadi” oyligi doirasida 57 ta yirik tanlovlar, uchrashuvlar, o‘quvlar, mehnat yarmarkalari va boshqa loyihalar tashkil etilib, 250 mingdan ortiq yoshlar qamrab olindi.

Dastlab oylik “Poytaxtning SMMchi qizlari” mavzusida mahorat darsi bilan start oldi. Qisqa vaqt ichida kam ta’minlangan va ishsiz qizlarni kasbga o‘rgatish maqsadida “Ayollar daftari”, “Yoshlar daftari” va “Temir daftar”ga kiritilgan 500 nafar xotin-qizlar 2 oylik SMM mutaxassisligiga bepul o‘qitildi.

Shuningdek, oylik doirasida tabiatni asrash, unga har bir fuqaroning daxldorlik hissini oshirish, o‘quvchi va talabalarning ekologik madaniyatini yuksaltirish maqsadida “Yangi O‘zbekiston” bog‘ida “Yashil shahar” ekologik aksiyasi o‘tkazildi. Aksiya davomida bog‘ hududida  taniqli shaxslar va volontyorlar ishtirokida 300 tup chinor ko‘chati ekildi. Shuningdek, aksiya doirasida umumta’lim maktab o‘quvchilari o‘rtasida “Tabiat uchun g‘amxo‘rmiz” shiori ostida rasmlar tanlovi tashkil etildi.

Yoshlarni sog‘lom turmush tarziga jalb qilish, sportga bo‘lgan qiziqishlarini oshirish maqsadida Oliy ta’lim muassasalari talabalari o‘rtasida “Besh tashabbus olimpiadasi” doirasida sportning voleybol, yengil atletika, shashka va stol tennisi, stritboll, mini futbol kabi turlari bo‘yicha musobaqalar tashkil etildi.

Ilk marotaba Toshkent shahar Bolalar tashkilotining I konferensiyasi o‘tkazilib, bolalar tashkilotining kelgusidagi ishlari rejasi tasdiqlandi. Toshkent shahar hokimligi tashabbusi bilan bir guruh talaba-yoshlarning takliflari inobatga olgan holda Toshkent talabalar assosiatsiyasining birinchi ta’sis yig‘ilishi o‘tkazildi.  Toshkent shahridagi volontyorlik guruhi rahbarlari, yoshlar yetakchilari, turli yo‘nalishlarda faoliyat olib boradigan 600 nafar faol volontyorlar ishtirokida Volontyorlar forumi o‘tkazildi.

Bundan tashqari, poytaxtda ilk marotaba 300 dan ortiq maktablar, 50 dan ortiq professional ta’lim muassasalari, 90 dan ortiq oliy ta’lim muassasalarida tahsil olayotgan yosh o‘qituvchilar, olimlar, tadqiqotchilar hamda tayanch doktorantlardan iborat 500 nafardan ziyod ilm egalari bir platformada jam bo‘lishdi. Toshkent shahar Yosh o‘qituvchi va olimlar kengashining I ta’sis yig‘ilishi aynan ilm egalari uchun fikr almashish maydoni bo‘ldi. Kelgusi ish rejalar muhokama qilinib, “Yosh o‘qituvchi va olimlar Kengashi” boshqaruvi raisi saylandi.

Oliy ta’lim muassasalarining 50 000 nafar talabalari uchun sohaning yetuk mutaxassislari ishtirokida ochiq muloqot forumi o‘tkazildi. “Zakovat arena” binosida o‘tkazilgan sohalar kesimidagi ochiq muloqotlarda yoshlar o‘zini qiziqtirgan barcha savollariga mutaxassaislardan to‘g‘ridan to‘g‘ri javob olish imkoniyani berdi.

18-noyabr O‘zbekiston Davlat bayrog‘ining qabul qilinganiga 33 yil to‘lishi munosabati bilan “Yoshlik” talabalar shaharchasida yoshlarni harbiy-vatanparvarlik ruhida tarbiyalashga qaratilgan madaniy tadbirlar, paradlar, jangovar ko‘rgazmali chiqishlar namoyish etildi. 

“Toshkent yoshlarni sevadi” oyligi doirasida noyabr oyi davomida Toshkent shahrida joylashgan 325 ta umumta’lim maktablarida hamda barcha tumanlarida “Bolalar harakati” sardorlar saylovi o‘tkazildi. 30 noyabr kuni Yoshlar markazida “Yuksak maqsadlar sari birlashaylik!” shiori ostida Toshkent shahar sardorlarining I forumi bo‘lib o‘tdi. Unda 6 ta yo‘nalish bo‘yicha Toshkent shahar sardorlari va bosh sardori saylandi.

Iqtidorli bolalarni aniqlash, ularni har tomonlama qo‘llab-quvvatlash, ularning iste’dod va mahoratlarini namoyon qilishlari uchun imkoniyat yaratish maqsadida har yili an’anaviy tarzda o‘tkazish maqsadida ilk marotaba “Orzu” bolalar ijodiyoti festivali tashkil etildi. Unda 2153 nafar bola ro‘yxatdan o‘tkazildi. Festivalda 6 yoshdan 14 yoshgacha bo‘lgan bolalar uch yosh toifasida (6–8 yosh, 9–11 yosh va 12–14 yosh) ishtirok etdi. Ular vokal, adabiyot, klassika, raqs, cholg‘u, tasviriy va amaliy san’at kabi 6  yo‘nalishning birida o‘z iqtidorlarini namoyish etdi.

Ushbu oylik doirasida 9—13 dekabr kunlari umumta’lim maktablarining 36 ming nafar boshlang‘ich sinf o‘quvchilari uchun bepul konsert-shoular tashkil etildi.

“Alpomish” muz saroyida yirik tashkilotlar ishtirokida oliy ta’lim muassasalari bitiruvchi talabalari uchun “Kelajak Expo” hamda mutaxassislik talab etilmaydigan kasblar bo‘yicha “Diplomsiz ish” mehnat yarmarkalari,  “TOP 100 ta oliy o‘quv yurti” – Toshkent shahridagi oliy ta’lim muassasalarining targ‘ibot ko‘rgazmalari, ota-onalar va o‘quvchilar uchun o‘quv-markazlari forumi o‘tkazildi.

“Toshkent yoshlarni sevadi” oyligi yakunida tashkil qilingan gala-konsertda oylik doirasida o‘tkazilgan tanlovlarda va yil davomida Toshkent shahrida yoshlar bilan faol ishlagan va yoshlarga oid davlat siyosatini yuritishda jonbozlik ko‘rsatgan bir guruh yoshlar yetakchilari, shuningdek, “Orzu” bolalar ijodiyoti ko‘rik-tanlovi g‘oliblari hamda SMM kursining ilk 500 nafar bitiruvchilari tashkilotchilar tomonidan taqdirlandi.

Xususan, bepul SMM kursi bitiruvchilari uchun mobilografiya yo‘nalishida “Eng yaxshi ijodiy ish” ko‘rik-tanlovi o‘tkazilib, 10 ta eng sara video mualliflari g‘olib deb topildi va Toshkent shahar hokimligi tomonidan Iphone 16 telefoni bilan rag‘batlantirildi. 200 nafar faol yoshlar yetakchilariga esa xorijga sayohat, dam olish maskanlariga yo‘llanma, kompyuter kabi sovg‘alar taqdim qilindi. “Orzu” bolalar ijodiyoti ko‘rik-tanlovining adabiyot, klassika, raqs, cholg‘u, tasviriy va amaliy san’at yo‘nalishi g‘oliblari diplom, statuyetka va planshet bilan taqdrilandi.