Xorvatiya poytaxti Zagrebning Prechko tumanidagi maktabga hujum uyushtirildi. Pichoq bilan qurollangan o‘smir maktabga bostirib kirib, yetti nafar o‘quvchi va o‘qituvchini yaraladi.
Bu haqda Xorvatiya bosh vaziri Andrey Plenkovich HRT telekanaliga ma’lum qildi.
“Biz, butun Xorvatiya jamoatchiligi kabi, bugun ertalab Zagrebdagi Prechko boshlang‘ich maktabida sodir bo‘lgan katta fojiadan chuqur qayg‘udamiz. Hozirda ichki ishlar vaziri Davor Bojinovich hamda fan va ta’lim vaziri Radovan Fuks voqea joyida bo‘lib turibdi. Politsiya va boshqa barcha xizmatlar surishtiruv harakatlarini boshlab yuborgan”, dedi Andrey Plenkovich.
HRT telekanali maʼlumotlariga ko‘ra, hujum qilgan shaxs o‘sha maktab o‘quvchisi bo‘lishi mumkin. Telekanalning taʼkidlashicha, jarohat olgan o‘quvchilardan biri vafot etgan.
Joriy yilning sentyabr oyida Rossiyaning Chelyabinsk shahridagi 68-maktabda bolg‘a bilan qurollangan o‘smir o‘quvchi va o‘qituvchilarga hujum qilgandi.
Hodisa oqibatida to‘rt kishi jarohatlangan, ular orasida bir nafar o‘qituvchi ham bor.
Hujum sodir etgan 7-sinf o‘quvchisi o‘ziga ham jarohat yetkazgan. U binoga pichoq, bolg‘a va to‘pponcha olib kirgan. Ammo keyinchalik to‘pponcha haqiqiy emas, mulyaj ekani aniqlangan.
“O‘quvchi bolg‘ani maktabga qanday olib kirgani katta savol tug‘dirmoqda. Nima uchun qo‘riqlash xizmati bunga e’tibor bermagan? Huquqni muhofaza qilish organlari, Ta’lim vazirligi, shahar ma’muriyati va bola huquqlari bo‘yicha vakilga vaziyatni batafsil o‘rganib chiqish to‘g‘risida ko‘rsatma berdim. Shuningdek, barcha ta’lim muassasalarida tekshiruvlar o‘tkazish haqida ham topshiriq berdim”, degandi gubernator Aleksey Teksler.
Izoh (0)