Uzoq yillar ideal oila sifatida tanilgan yulduzli juftliklar ancha vaqt davomida birgalikda umr kechirganiga qaramay, ba’zan ajralishga majbur bo‘ladi. Bunday qarorga kelishga ulardagi shaxsiy muammolar, oiladagi kutilmagan burilishlar yoki shunchaki yangi baxtni izlash istagi sabab bo‘ladi. Quyida nikohi 20 yildan ortiq davom etganiga qaramay, ajrimni tanlagan mashhurlar haqida so‘z boradi.
Hyu Jekman va Deborra Li Ferness
Hyu va Deborra juftligi 27 yil birga yashadi va ular doimo turli tadbirlarga birgalikda tashrif buyurar edi. Biroq 2023-yilda ular hayotida yangi sahifa ochish istagini bildirib, rasman ajrashganini e’lon qilishdi. Yaqinda esa ajralish sababi aktyorning xiyonati bo‘lgan, degan mish-mishlar paydo bo‘ldi.
Jeff Bezos va Makkenzi Skott
Bezos va Skott 25 yillik nikohdan keyin 2019-yilda rasman ajrashdi. Ularning bu qarori o‘sha vaqtda eng ko‘p muhokama qilingan voqealardan biriga aylandi, chunki tadbirkor 5 yil avval dunyodagi eng badavlat odam edi. Makkenzi ajrimdan keyingi mulkni taqsimlashda Amazon kompaniyasi aksiyalarining katta qismini oldi. So‘ng u ezgu ishlarda faol ishtirok etdi va turli tashkilotlarga milliardlab dollar mablag‘ xayriya qildi.
Meril Strip va Don Gammer
Meril Strip va Don Gammer 1978-yilda turmush qurdi va ularning munosabatlari uzoq yillar davomida Gollivudning eng namunali oilasi sifatida tan olindi. Oilada to‘rt farzand: Genri, Memi, Greys va Luiza dunyoga keldi. Ammo 2023-yil oktyabr oyida er-xotin olti yildan ortiq vaqt davomida alohida yashab kelgani ma’lum bo‘ldi. Shunga qaramay, aktrisa Strip ajrashgandan keyin ham sobiq turmush o‘rtog‘iga hurmat ko‘rsatib, nikoh uzugini taqishda davom etgan.
Kris va Keytlin Jenner
Mashhur juftlik 22 yillik davomida baxtli hayot kechirdi, ammo 2014-yil dekabrida ajrashishga qaror qildi. Bu Keytlin Jennerning o‘z jinsini o‘zgartirishdan bir yil avval sodir bo‘ldi. Kris Jenner erining ayol bo‘lish istagini to‘g‘ri qabul qila olmagan. Shunga qaramay, hozirda sobiq turmush o‘rtoqlar do‘stona munosabatlarni saqlab qolgan hamda farzandlari Kendall va Kayli uchun muloqot qilishda davom etmoqda. Juftlikning turmush qurish va ajralish haqidagi hikoyasi “Kardashyanlar oilasi” realiti-shousida keng yoritilgan.
Billi Rey Sayrus va Tish Sayrus
Xonanda Mayli Sayrusning ota-onasi 30 yil birga yashaganiga qaramay, ajrashib ketishgan. So‘ng ularning ikkisi ham qayta turmush qurgan. Tish 2023-yil avgust oyida aktyor Dominik Pursel bilan, Billi Rey xonanda Fayrouz bilan oila qurgan.
Izoh (0)