Filmni suratga olish guruhi turli vazifalarni bajaradigan yuzlab a’zolardan iborat bo‘ladi. Gollivud olamida ishchi guruh bilan turli nizolarga borgan aktyorlar va ularning tortishuvlari haqidagi xabarlar odatiy holdir.
Ammo tanganing ikkinchi tomoni bo‘lgani kabi, katta kino sanoatida hamkasblari bilan doimo iliq munosabatda bo‘lgan va barchada yaxshi taassurot qoldirgan mashhurlar ham talaygina. Quyida yulduzlik kasaliga chalinmagan va mojaroli xabarlarda ismlari hech qachon tilga olinmagan aktyorlarni ko‘rib chiqamiz.
Dueyn Jonson
Dueyn Duglas Jonson, “Qoya” laqabi bilan ham tanilgan. U nafaqat Gollivudning eng yuqori maosh oladigan iste’dodli aktyori va biznesmen, balki muxlislari orasida yaxshi nom olgan insondir. Aktyor haqida kamdan kam yomon xabarlarni eshitish mumkin, uning hamkasblar Dueynni mehribonligi, samimiyligi va ijobiy energiya tarata olishi bilan maqtaydi.
Jonsonning “Malibu qutqaruvchilari” filmidagi hamkasbi Zak Efron aktyor haqida ko‘p bor yaxshi fikrlarni bildirgan. U “Qoya”ning xarakterini yildan yilga ochilib boradigan gulga o‘xshatgan.
Jorj Kluni
Jorj Kluni Gollivuddagi eng yirik yulduzlardan biri bo‘lib, u “Oushenning o‘n ikki do‘sti”, “Betmen va Robin”, “Tundan tonggacha” va boshqa ko‘plab filmlari bilan mashhur. Aktyor butun dunyoga shunchalik tanilganki, Kluni aktyorlik faoliyatini to‘xtatsa ham, ko‘p yillar davomida taniqli yulduz bo‘lib qolishi shubhasiz.
Katta gonorarlar, hashamatli uylar, mashhurlik va millionlab muxlislarga ega bo‘lish Jorj Klunining shaxsiyatiga hech qanday salbiy ta’sir ko‘rsatmagan. Uning hamkasblari Jorjning xarakterini tez-tez maqtab turadi.
“Yovvoyi g‘arb dunyosi” bosh aktrisalaridan biri Evan Reychel Vud “Mart kunlari” filmida birgalikda ishlashda juda ko‘p ijobiy tajribaga ega bo‘lganini aytdi. Suratga olish ishlarida Kluni o‘zini dono, xushchaqchaq va yulduzlik kasaliga chalinmagan shaxs sifatida namoyon qilgan. U ishchi guruhning har bir a’zosiga hurmat bilan murojaat qilgan.
Hyu Jekman
“Rosomaxa”ni ham hamkasblari doim yaxshi ta’riflar bilan eslaydi. Biz aktyorni qattiqqo‘l Logan obrazi orqali taniganmiz, hayotda esa u butunlay boshqacha bo‘lib, tabassum va ijobiy kayfiyat uning doimiy hamrohidir.
Jekmanning hamkasbi — professor Ksavyer rolini o‘ynagan Patrik Styuart uni hazilkash, kulgili va shirinso‘z ekanini aytgan.
Tom Henks
Internet va shou-biznes olamidagi turli janjallarga to‘la davrda mukammal obro‘ga ega aktyorni topish mushkul. O‘tmishdagi biror voqea haqida birgina xabar aktyorning uzoq yillar yig‘gan hurmatini to‘kib yuborishi mumkin.
Tom Henks esa ideal obro‘ga ega kamyob aktyorlardan biridir. Uning xarakteri “Forrest Gamp”da o‘ynagan o‘sha xushmuomala yigitnikiga o‘xshaydi. Tom haqiqatan ham tasodifiy odamlar bilan suratga tushishni yoki to‘satdan paydo bo‘lib, ko‘chadagi insonlar suratlarini “buzishni” yaxshi ko‘radi. Aktyorni kamdan kam g‘azablangan yoki asabiylashgan holatda ko‘rish mumkin. U bilan birga ishlagan barcha hamkasblari Henks haqida faqat yaxshi gaplarni aytishadi. Misol uchun, aktrisa Emma Uotson “Sfera” filmida ishlagandan keyin Tomni haqiqiy qahramon deb atagan.
Kianu Rivz
Albatta, ushbu ro‘yxatni internetda eng yoqimli aktyorlardan biri deb hisoblangan Kianu Rivzsiz tuzib bo‘lmas edi. Hayoti fojiali voqealarga to‘la bo‘lganiga qaramay, Kianu yulduzlik kasaliga chalinmadi. Aksincha, u orttirgan boyliklarini yanada ko‘proq ezgu amallar qilishga sarfladi.
U “Matritsa” filmi uchun olgan yirik gonorarini uy, mashina va zargarlik buyumlariga emas, balki xayriya va hadyalarga sarfladi. Rivz barcha pullarni vizajist, kompyuter texniklari va kadr ortidagi boshqa mehnatkashlarga taqsimlab berdi. Shuningdek, har bir kaskadyor Kianudan sovg‘a tariqasida qimmatbaho velosipedlar oldi.
Umuman olganda, Kianuning xayrli ishlari ro‘yxatini cheksiz davom ettirish mumkin. “Professional” filmini suratga olish jarayonida muxlislar uni bir necha soat davomida suratga olish maydonchasi yonida kutishgan. Hamma aktyorlar ularga e’tibor bermay, syomka binosidan chiqib ketgan bo‘lar edi, lekin Kianu barcha bilan suratga tushgan, dastxatlar bergan va hatto ular bilan suhbatlashgan.
Izoh (0)