Yoshdagi bir necha yillik tafovut mashhurlarning oila qurishi yoki bir-biriga ko‘ngil qo‘yishiga to‘sqinlik qila olmaydi. Buni quyidagi yulduzlar o‘z misolida isbotlagan.
Sidni Suini va Jonatan Davino — 14 yosh farq
Sidni Suini va Jonatan Davino 2018-yilda tanishgan va 2022-yilda unashtirilgan. Muvaffaqiyatli biznesmen Davino 27 yoshli aktrisadan 14 yosh katta. 2024-yil oktyabr oyida Suini Glamour jurnaliga bergan intervyusida qallig‘iga moliyaviy jihatdan qaram emasligini aytgan. U yoshdagi katta tafovutga qaramay, ularning munosabatlari jiddiy ekanini ta’kidlaydi:
“Sizni yaxshi biladigan, qadriyatlaringiz va fikrlaringizni to‘liq qo‘llab-quvvatlaydigan odam bilan ishlash ajoyib”, deydi Sidni.
Jeffri Din Morgan va Hilari Byorton — 16 yosh farq
Jeffri Din Morgan va Hilari Byorton tanishganiga 15 yildan oshgan, olti yil avval esa ular munosabatlarini rasmiylashtirgan. Hozir er-xotin Nyu York chekkasida istiqomat qilib, bir qiz va bir o‘g‘ilni tarbiyalamoqda. Ularning shaxsiy fermasi hamda Samuel’s Sweet Shop nomli shirinliklar do‘koni bor. Vaqti-vaqti bilan aktyorlar suratga olish ishlari va kinofestivallarda ishtirok etadi.
Bredli Kuper va Jiji Hadid — 20 yosh farq
2023-yil iyun oyida Bredli Kuper va Jiji Hadidning do‘stligi to‘laqonli munosabatlarga aylandi. Ular o‘xshash dunyoqarash, bolalarni tarbiyalash haqidagi fikri va yuqori martaba kabi umumiy tomonlari borligini tushunishdi. Avvaliga juftlik o‘zlarining munosabatlarini barchadan sir tutdi, so‘ng ular dam olish kunlari farzandlari bilan turli joylarda sayr qilayotganida paparatssiga tushib qola boshladi. Yanvar oyida Kuper Jijini onasi bilan tanishtirdi. Modelning yaqinlari ularning turmush qurishiga qarshi emas.
“Jiji Hadid uchun qizi har doim birinchi o‘rinda turadi. Unga Bredlining ota sifatida buni yaxshi tushunishi yoqadi. Modelning fikricha, Kuper o‘tmishda uchratgan yigitlarga qaraganda ancha mas’uliyatli odam”, deb yozadi People nashri.
Jeyson Steytem va Rouzi Hantington-Uaytli — 20 yosh farq
Jeyson 2010-yilda, Kaliforniyadagi musiqiy festivallardan birida model Rouzi Hantington-Uaytli bilan uchrashadi va u aktyorni hayratda qoldiradi. Aktyor bir necha bor unga o‘xshagan ayollarni hech qachon uchratmaganini aytgan. Dastlab hech kim bu sevgiga ishonmadi, muxlislar bu aktyorning yosh va go‘zal qiz bilan uzoqqa bormaydigan munosabati deb o‘yladi. 2016-yilda unashtiruv haqida e’lon qilgan juftlik 2017-yilda o‘g‘il farzandli bo‘lgan.
“U erinmay erta tong soat 5 da turadi, otalik vazifalarini bajaradi va men yana bir necha soat uxlab olishimga imkon beradi. U juda namunali va yaxshi ota. Bu borada men juda omadliman!”, deydi model Steytem haqida.
Aaron Teylor-Jonson va Sem Teylor-Jonson — 23 yosh farq
Aaron Sem Teylor bilan uchrashganida 19 yoshda edi. Ular 2008-yilda “Jon Lennonga aylanish” filmini suratga olish maydonchasida uchrashgan. Aktyor o‘sha paytda 42 yoshli Semga e’tiborini qaratgan. Atrofdagilar bunga qarshi bo‘lsa-da, ikkisi ham munosabatlarda jiddiylashib ketdi.
Avvaliga ko‘pchilik yosh aktyor rejissyor bilan ishqiy munosabatda bo‘lib Gollivudga yo‘l olmoqchi, deb gumon qildi, ammo vaqt hamma narsani o‘z o‘rniga qo‘ydi. Ular uchrashganidan uch yil o‘tgach, turmush qurdi va hozirda ikki nafar farzandni tarbiyalab kelmoqda. Aaronning ta’kidlashicha, uning rafiqasi o‘zidan ko‘ra ko‘proq energiyaga ega va yoshdagi farq mutlaqo sezilmaydi.
“Ko‘pchilik 20 yoshida qilgan ishni men 13 yoshimda bajarib bo‘lgan edim. Bu kimdir uchun g‘ayrioddiy tuyular, ammo har qanday yoshda hayotdan zavq ola bilish kerak deb hisoblayman”, deydi aktyor.
Izoh (0)