Gollivud yulduzlari orasida tabiat muhofazasiga o‘z hissasini qo‘shadiganlari ko‘p. Ko‘plab aktyorlar, rejissyorlar, teleboshlovchilar global isish va boshqa ekologik muammolarni hal qilishda juda faoldir.
Leonardo Di Kaprio
“Titanik” kinokartinasi yulduzi Leonardo Di Kaprio Yer sayyorasining ekologik himoyachilaridan biri bo‘lib, aktyor tomonidan amalga oshirilgan xayriya ishlari Jeyms Kemeronning “Titanik” filmi bilan bevosita bog‘liq. Di Kaprio hatto mazkur tadbirga boshqa ko‘plab yulduzlarni jalb qilgan.
1998-yilda “Titanik” filmini suratga olish ishlari tugaganidan so‘ng, aktyor iqlim falokatining oldini olish masalalari bilan shug‘ullanadigan mutaxassislarni jalb qildi va o‘zining Global Green jamg‘armasini tashkil qildi. Bundan o‘n yil avval “Oskar” mukofotini topshirish marosimida Di Kaprio shunday degan edi:
“Iqlim o‘zgarishi muammosi haqiqatdir. Bu barcha tirik jonzotlar oldida turgan eng dolzarb tahdid. Biz unga qarshi birgalikda mehnat qilishimiz va iqlim o‘zgarishini to‘xtatishimiz kerak”.
Jamg‘arma yovvoyi tabiat, dengiz flora va faunasi hamda qo‘riqlanadigan yerlardagi mahalliy aholi huquqlarini himoya qilish bo‘yicha loyihalarni moliyalashtiradi.
2021-yilda rebrendingdan so‘ng jamg‘arma Re:wild degan nomga o‘zgartirildi va Global Wildlife Conservation bilan birlashtirildi. Re:wild 50 ta davlatda faoliyat yuritadi, 120 ga yaqin turli loyihalarni qo‘llab-quvvatlaydi va 60 dan ortiq kompaniyalar bilan hamkorlik qiladi. Shuningdek, 2022-yilda Di Kaprio xalqaro iqlim fondiga 45 million dollar mablag‘ ajratgan.
Mett Deymon
Mett Deymon iqlim o‘zgarishi muammosiga 1980-yillarda Gvatemalaga safaridan so‘ng e’tibor qaratdi. Aktyor mahalliy aholining aksariyati suvsiz yashayotgani, ovqat pishira olmasligi va istagan paytda chanqoqni qondira olmasligiga o‘z ko‘zlari bilan guvoh bo‘ldi. Bundan bir necha yil o‘tgach, u qishloq aholisiga yordam berish uchun Zambiyaga ko‘ngilli ravishda keldi. Deymon 2006-yilda H20 Africa foundation jamg‘armasiga asos soldi.
“Suvdan foydalanish imkoni bu — ta’lim olish, mehnat qilish va eng muhimi, oilalarimiz va butun insoniyat uchun kelajak sari imkoniyatdir”, deb yozadi aktyor.
Tashkilot keyinchalik butun dunyo bo‘ylab suv tanqisligiga uchragan odamlarga yordam berish uchun Water Partners kompaniyasi bilan hamkorlik qila boshladi.
Sheylin Vudli
“Urush va tinchlik” seriali, “Ferrari”, “Yulduzlar aybdor”, “Divergent” va boshqa filmlardagi rollari bilan tanilgan aktrisa bolaligidanoq sayyoramizni himoya qilish masalasiga befarq bo‘lmagan. U Kaliforniyada o‘qib yurgan maktabida turli chiqindilarni alohida idishlarga yig‘ishni joriy qilgan. Sheylin tabiatni asrashga bo‘lgan ishtiyoqini bolalikda ko‘rgan voqea bilan izohlaydi:
“Men Kosta-Rikadagi amakim uyiga tashrif buyurdim, u yerda amakim qizi bilan o‘rmon bo‘ylab ko‘p sayr qildim va ajoyib hayvonot olamini kuzatdim. Bir kuni men “Avatar” filmidagiga o‘xshash katta va ulug‘vor daraxtga duch keldim. Bunday go‘zal manzara meni taajjubga solgan edi”, deb eslaydi aktrisa.
Vudli Amerikaning tub aholisi an’analarini qo‘llab-quvvatlaydi va kimyoviy dorilar o‘rniga giyoh va o‘simliklar bilan o‘zini davolaydi, avval ishlatilgan kiyimlarni sotib oladi va faqat mahalliy taomlarni iste’mol qiladi.
Bong Jun Xo
“Parazitlar” trilleri uchun to‘rtta “Oskar”ni qo‘lga kiritgan rejissyor Bong Jun Xo vatani Janubiy Koreyada nafaqat ijodiy, balki atrof-muhitni muhofaza qilish tashabbuslari bilan ham tanilgan. Rejissyor o‘z filmlarida ko‘pincha ekologiya mavzusini, hayvonlarni yetishtirish sanoati va iqlim o‘zgarishi muammosini ilgari suradi. Bundan tashqari, rejissyor barqaror rivojlanish tamoyillari asosida ekologik toza usulda ishlab chiqarishni targ‘ib qiluvchi filmlarni suratga oladi.
“Iqlim o‘zgarishi nafaqat kelajakdagi odamlar uchun, balki hozirda biz uchun eng global muammodir”, deydi Jun Xo.
Jun Xoning 2006-yilda suratga olingan “Dinozavrlar hujumi” filmi biologik qurollar muammosiga bag‘ishlangan, 2017-yilda ishlangan “Okcha” filmida fermalardagi hayvonlarga nisbatan shafqatsiz munosabat tasvirlangan, 2013-yilda suratga olingan “Qorlar aro” filmida global iqlim o‘zgarishi va uning oqibatlari oldida boy va kambag‘allarning tengligi mavzusi yoritilgan.
Marion Kotilyar
Kotilyar — atrof-muhitni himoya qilish ishlarida faol ekolog va Greenpeace tashkiloti vakili. U 2005-yilda “Iqlim uchun chizmalar" (Dessins pour le climat) loyihasida ishtirok etdi. Unda yulduzlar chizmalari savdosi bo‘lib o‘tdi va tushgan mablag‘lar atrof-muhit faollarini qo‘llab-quvvatlashga yo‘naltirildi.
Aktrisa 2020-yilda bir nechta faollar bilan birga iqlim o‘zgarishi ko‘lamini shaxsan ko‘rish uchun Arktikaga yo‘l oldi.
“Arktika bizga insonlar tomonidan tegilmagan joydek ko‘rinsa-da, shunday olis makon ham inson tufayli aziyat chekmoqda”, dedi Kotilyar.
Lyuk Besson
2009-yilda rejissyor ekologiyaga bag‘ishlangan kino haqidagi umumiy tasavvurlarni tubdan o‘zgartirdi. Fotosuratchi Yan Artyus-Bertran bilan hamkorlikda u byudjeti 17 million dollar bo‘lgan “Uy” nomli hujjatli filmini suratga oldi. Ekologik muammolar haqidagi film 5-iyun — atrof-muhitni muhofaza qilish kunida 87 ta mamlakatning yirik platformalarida bepul namoyish etildi.
Filmda Yerning ajoyib manzaralari taqdim etildi va insoniyat go‘zal tabiat va ekotizimlarga qanchalik salbiy ta’sir etayotgani tushuntirildi.
Izoh (0)