1965-yilda “I operatsiyasi” filmi ekranlarga chiqishidan avval aktyor Aleksandr Demyanenkoga boshqa filmlar uchun bosh rollar taklifini berishgan. U “Davlat jinoyatchisi”, “Dima Gorin karyerasi” filmlarida suratga tushgan. Tabiatan kamtarin va kamgap Aleksandr Shurik obrazi esa unga katta muvaffaqiyat va mashhurlik keltirdi. So‘ng u o‘z karyerasini “Kavkaz asirasi” va “Ivan Vasilyevich kasbini o‘zgartiradi” filmlaridagi rollari bilan mustahkamladi.
Doimo drama yo‘nalishida ishlashni istasa-da, “I operatsiyasi va Shurikning boshqa sarguzashtlari” filmi uchun Demyanenko Gamlet rolidan voz kechgan. Ko‘chalarda uni ko‘rib qolganlar “Ana, Shurik kelyapti” deya hayqirishlari unga hech ham yoqmagan. Shu sababli Demyanenko talaba Shurik obrazini yomon ko‘ra boshlagan.
Shurik roli uchun kasting qanday o‘tgan?
Ssenariyni yozish vaqtida Leonid Gayday Shurik obrazini o‘zining hayotdagi xarakteriga o‘xshatishga harakat qilgan. Keyinroq rejissyorning rafiqasi Nina Grebeshkovaning aytishicha, rejissyor tabiatan xarakteri o‘ziga yaqin aktyorni izlagan.
Kastingda Andrey Mironov, Aleksandr Zbruyev, Oleg Vidov va boshqa aktyorlar ishtirok etgan. Badiiy kengash Valeriy Nosikni mazkur rolga mos deb hisoblagan. Ammo Gayday Shurik sifatida faqat Aleksandr Demyanenkoni ko‘ra olgan.
Rejissor bundan avval aktyor bilan ishlagan: ular “Shamol” filmida birga rol ijro etgan. Gayday shaxsan Leningradga Demyanenko bilan uchrashish uchun ketgan. Aktyorga ssenariy ma’qul kelgan va u suratga tushishga rozi bo‘lgan.
Aleksandr Demyanenkoning keying faoliyati
Leonid Gaydayning yorqin komediyalaridan so‘ng xalq orasida bitta obrazda tanilgan Demyanenko teatrda ishini davom ettirdi, Leningrad televideniyesidagi teledasturni olib bordi hamda dublyaj ishlarida faol ishtirok etdi. 1980-yillarda aktyor Robert de Niro, Jan-Pol Belmondo, Omar Shariflarga ovoz berdi.
Oradan o‘n yil o‘tgach, u “Qulupnay” sitkomida bosh rolni ijro etib, ekranlarga qaytdi. Ammo Demyanenko bu taklifga faqat pul uchun rozi bo‘lganini yashirmadi.
Aktyorning yuragi bilan bog‘liq jiddiy muammolari bo‘lgan. Infarktni bir marta oyoqda kechirgan Demyanenko oradan biroz vaqt o‘tib, qayta infarkt bo‘lib qolgan. Jarrohlik amaliyoti o‘tkazilishi kerak bo‘lgan, ammo aktyor ungacha yetib borolmagan. Aleksandr Demyanenko 1999-yil avgustda vafot etdi.
Izoh (0)